ರೋಹಿತ್ ಶರ್ಮಾ ಅವರ ಅಮೋಘದ ಶತಕದ ನೆರವಿನಿಂದ ಕಟಕ್ ನಲ್ಲಿ ನಡೆದ 2ನೇ ಪಂದ್ಯವನ್ನು 4 ವಿಕೆಟ್ ಗಳಿಂದ ಗೆದ್ದಿರುವ ಟೀಂ ಇಂಡಿಯಾ 3 ಪಂದ್ಯಗಳ ಏಕದಿನ ಸರಣಿಯನ್ನು ಒಂದು ಪಂದ್ಯ ಬಾಕಿ ಇರುವಾಗಲೇ ಗೆದ್ದುಕೊಂಡಿತು.ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಇಂಗ್ಲೆಂಡ್ ತಂಡ 49.6 ಓವರ್ ಗಳಲ್ಲಿ 304 ರನ್ ಗಳಿಗೆ ಇನ್ನಿಂಗ್ಸ್ ಮುಗಿಸಿತು. ಈ ಮೊತ್ತವನ್ನು ಭಾರತ ತಂಡ 43. 5 ಓವರ್ ಗಳಲ್ಲಿ 6 ವಿಕೆಟ್ ಕಳೆದುಕೊಂಡು ಬೆಂಬತ್ತಿ ಜಯಶಾಲಿಯಾಯಿತು.
ಸವಾಲಿನ ಮೊತ್ತ ಬೆಂಬತ್ತ ಹೊರಟ ಭಾರತಕ್ಕೆ ನಾಯಕ ರೋಹಿತ್ ಶರ್ಮಾ ಮತ್ತು ಉಪನಾಯಕ ಶುಭಮನ್ ಗಿಲ್ ಅವರು ಭರ್ಜರಿ ಆರಂಭ ಒದಗಿಸಿದರು. ಅವರಿಬ್ಬರು ಶತಕದ ಜೊತೆಯಾಟವಾಡಿದ್ದು ಇಂಗ್ಲೆಂಡ್ ಪಾಲಿಗೆ ನುಂಗಲಾರದ ತುತ್ತಾಯಿತು. ಮೊದಲ 10 ಓವರ್ ಗಳ ಪವರ್ ಪ್ಲೇನಲ್ಲಿ ಭಾರತ 77 ರನ್ ರನ್ ಬಾಚಿದರೆ, ಈ ಜೋಡಿ ಬೇರ್ಪಡುವ ಮೊದಲು 16.4 ಓವರ್ ಗಳಲ್ಲಿ 136 ರನ್ ಬಾಚಿತ್ತು.
ಗಿಲ್ ನಿರಂತರ 2ನೇ ಅರ್ಧಶತಕ: ಕೇವಲ 52 ಎಸೆತಗಳಿಂದ 60 ರನ್ ಕಬಳಿಸಿದ ಶುಭಮನ್ ಗಿಲ್ ಅವರು ನಿರಂತರ ಎರಡನೇ ಅರ್ಧಶತಕ ಗಳಿಸಿದರು. ಬಳಿಕ ಬಂದ ವಿರಾಟ್ ಕೊಹ್ಲಿ(5) ಬೇಗನೇ ಪೆವಿಲಿಯನ್ ಸೇರಿಕೊಂಡರು. ಆದರೆ ರೋಹಿತ್ ಶರ್ಮಾ(119) ಮತ್ತು ಶ್ರೇಯಸ್ ಅಯ್ಯರ್(44) ಅವರು ತಂಡದ ಮೊತ್ತವನ್ನು 200ರ ಗಡಿ ದಾಟಿಸಿದರು. ಕೇವಲ 90 ಎಸೆತಗಳಲ್ಲಿ 119 ರನ್ ಗಳಿಸಿದ ಅವರು ಮೈದಾನದ ಮೂಲೆ ಮೂಲೆಗೆ ಚೆಂಡನ್ನು ಅಟ್ಟಿದರು. ಅವರ 32ನೇ ಏಕದಿನ ಶತಕದಲ್ಲಿ 12 ಬೌಂಡರಿ 2 ಸಿಕ್ಸರ್ ಗಳಿದ್ದವು.
ಅನುಭವಿ ಜೋ ರೂಟ್ ಅವರು ಸಹ ಜವಾಬ್ದಾರಿಯುತ ಆಟವಾಡಿದರು. 72 ಎಸೆತಗಳಲ್ಲಿ 69 ರನ್ ಗಳಿಸಿದರು. ಒಂದು ತುದಿಯಿಂದ ವಿಕೆಟ್ ಬೀಳುತ್ತಿದ್ದರೂ ಅಂತಿಮ ಹಂತದಲ್ಲಿ ಲಿಯಾಮ್ ಲಿವಿಂಗ್ ಸ್ಟೋನ್ ಅವರು ವೇಗದ ಬ್ಯಾಟಿಂಗ್ ನಡೆಸಿದ್ದರಿಂದ ತಂಡದ ಮೊತ್ತ 300ರ ಗಡಿ ದಾಟುವಂತಾಯಿತು. ಭಾರತದ ಪರ ರವೀಂದ್ರ ಜಡೇಜಾ 35 ರನ್ ಗೆ 3 ವಿಕೆಟ್ ಪಡೆದು ಮಿಂಚಿದರು.
