ನವದೆಹಲಿ: ಉತ್ತರಪ್ರದೇಶದ ಪ್ರಯಾಗ್‍ರಾಜ್‍ನಲ್ಲಿ ನಡೆಯುತ್ತಿರುವ ಕುಂಭಮೇಳದಲ್ಲಿ ತನ್ನ ಆಕರ್ಷಕ ಕಣ್ಣುಗಳಿಂದಲೇ ಹೆಸರುವಾಸಿಯಾಗಿ, ರಾತ್ರೋರಾತ್ರಿ ಸಾಮಾಜಿಕ ಜಾಲತಾಣದಲ್ಲಿ ಕೋಟ್ಯಾಂತರ ಅಭಿಮಾನಿಗಳನ್ನು ಸೆಳೆದ ಮೊನಾಲಿಸಾಗೆ ಈಗ ಸಿನಿಮಾ ಆಫರ್ ಬರಲಾರಂಭಿಸಿದೆ. ಕಳೆದೆರಡು ದಿನಗಳ ಹಿಂದೆ ಬಾಲಿವುಡ್‍ನ ನಿರ್ದೇಶಕ ಸನೋಜ್ ಮಿಶ್ರಾ ತಮ್ಮ ತಂಡದೊಂದಿಗೆ ಮೊನಾಲಿಸಾರನ್ನು ಭೇಟಿ ಮಾಡಿದ್ದು, ತಮ್ಮ ಮುಂದಿನ ಚಿತ್ರದಲ್ಲಿ ಒಂದು ಪಾತ್ರವನ್ನು ಆಕೆಗಾಗಿ ಮೀಸಲಿಟ್ಟಿದ್ದಾರೆ.
ಬಾಲಿವುಡ್ ಸಿನಿಮಾರಂಗದಲ್ಲಿ ಈಗಾಗಲೇ ಸಾಕಷ್ಟು ನಟಿಯರು ತಮ್ಮ ಮಾದಕ ಮೈ ಮಾಟ, ಅಂದವಾದ ಕಣ್ಣುಗಳಿಂದ ಅಭಿಮಾನಿಗಳನ್ನು ಕಟ್ಟಿ ಹಾಕಿರುವ ಇತಿಹಾಸವಿದೆ. ರೇಖಾ, ಜಯಾಬಚ್ಚನ್, ಮೀನಾಕ್ಷಿ ಶೇಷಾದ್ರಿ, ಮಾಧುರಿ ದೀಕ್ಷಿತ್, ಕರಿಷ್ಮಾ ಕಪೂರ್, ಕರೀನಾ ಕಪೂರ್ ಹೀಗೆ ಬಾಲಿವುಡ್ ನಾಯಕಿಯರ ಪಟ್ಟಿ ಬಹಳ ದೊಡ್ಡದಾಗಿದೆ. ಸದ್ಯ ಆ ಪಟ್ಟಿಗೆ ಸೇರಲು ಈಗ ಮೊನಾಲಿಸಾಗೂ ಒಂದು ಆಫರ್ ಬಂದಿದೆ. ಇನ್ನು ಬಡ ಕುಟುಂಬದ ಮೊನಾಲಿಸಾಗೆ ಇದೊಂದು ದೊಡ್ಡ ಆಫರ್ ಆಗಿದ್ದು, ಇದೇ ಮೊದಲ ಬಾರಿಗೆ ಬೆಳ್ಳಿತೆರೆಯ ಮೇಲೆ ಮಿಂಚುವ ಅವಕಾಶ ಲಭಿಸಿದೆ. ಇದು ಆಕೆಯ ಬಾಳಲ್ಲಿ ಯಾವ ರೀತಿಯ ಬೆಳಕಾಗುತ್ತದೆ ಕಾದು ನೋಡಬೇಕಿದೆ.
