ನಾಯಕ ಮಾಯಂಕ್ ಅಗರ್ವಾಲ್ ಅವರ ಜವಾಬ್ದಾರಿಯುತ ಬ್ಯಾಟಿಂಗ್ ನ ಹೊರತಾಗಿಯೂ ಕರ್ನಾಟಕ ತಂಡ ರಣಜಿ ಟ್ರೋಫಿಯ ತನ್ನ ನಿರ್ಣಾಯಕ ಲೀಗ್ ಪಂದ್ಯದಲ್ಲಿ ಹರಿಯಾಣ ತಂಡದ ವಿರುದ್ಧ ಪ್ರಾಬಲ್ಯ ಸಾಧಿಸುವ ಅವಕಾಶವನ್ನು ಕೈಚೆಲ್ಲಿತು. ಪರಿಣಾಮ ಉಭಯ ತಂಡಗಳು ದಿನದ ಗೌರವಕ್ಕೆ ಭಾಜನವಾದವು.
ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಸಿ ಗುಂಪಿನ ಪಂದ್ಯದ ಮೊದಲ ದಿನವಾದ ಗುರುವಾರ ಟಾಸ್ ಸೋತು ಬ್ಯಾಟಿಂಗ್‍ಗೆ ಆಹ್ವಾನ ಪಡೆದ ಕರ್ನಾಟಕ, ದಿನದಾಟದಂತ್ಯಕ್ಕೆ 89 ಓವರ್‍ಗಳಲ್ಲಿ 5 ವಿಕೆಟ್ ಕಳೆದುಕೊಂಡು 267 ರನ್ ಕಲೆ ಹಾಕಿತು.
ಮುರಿಯದ ಆರನೇ ವಿಕೆಟ್‍ಗೆ ಜತೆಯಾಗಿರುವ ಕೃಷ್ಣನ್ ಶ್ರೀಜಿತ್(18*) ಮತ್ತು ಯಶೋವರ್ಧನ್ ಪರಂತಾಪ್(27) ಎರಡನೇ ದಿನಕ್ಕೆ ಕ್ರೀಸ್ ಕಾಯ್ದುಕೊಂಡಿದ್ದಾರೆ.ಇವರಿಬ್ಬರೇ ಕರ್ನಾಟಕದ ಬ್ಯಾಟಿಂಗ್ ಸರದಿಯಲ್ಲಿ ಉಳಿದಿರುವ ತಜ್ಞ ಬ್ಯಾಟರ್ ಗಳು. ಇವರು ಶುಕ್ರವಾರ ಉತ್ತಮ ಜೊತೆಯಾಟ ಮುಂದುವರಿಸಿದಲ್ಲಿ ಪಂದ್ಯ ಸಂಪೂರ್ಣ ಕರ್ನಾಟಕದ ಹಿಡಿತಕ್ಕೆ ಬರುವುದರಲ್ಲಿ ಯಾವುದೇ ಸಂಶಯವಿಲ್ಲ.
