ಟಿ20 ಅಂತಾರಾಷ್ಟ್ರೀಯ ಪಂದ್ಯವೊಂದರಲ್ಲಿ ಯಾವ ತಂಡ ಅತಿ ಕಡಿಮೆ ಮೊತ್ತ ದಾಖಲಿಸಿದೆ ಎಂದು ಕೇಳಿದರೆ ಬಹುತೇಕರು ಥಟ್ಟನೆ ಗೂಗಲ್ ನಲ್ಲಿ ಹುಡುಕಾಡಿ ಮಂಗೋಲಿಯಾ ಎಂದು ಹೇಳಬಹುದು. ಏಕೆಂದರೆ, ಆ ತಂಡ, ಸಿಂಗಾಪುರ ವಿರುದ್ಧ ಬಂಗಿಯಲ್ಲಿ ನಡೆದಿದ್ದ ಟಿ20 ಪಂದ್ಯದಲ್ಲಿ ಕೇವಲ 10 ರನ್ ದಾಖಲಿಸಿ, ಟಿ20ಐ ಇತಿಹಾಸದಲ್ಲೇ ಅತಿ ಕಡಿಮೆ ರನ್ ಪೇರಿಸಿದ ಕುಖ್ಯಾತಿಯನ್ನು ಪಡೆದಿತ್ತು.
ಆದರೆ, ಈಗ ಆ ಕುಖ್ಯಾತಿ ಆಫ್ರಿಕಾದ ಐವರಿ ಕೋಸ್ಟ್ ಕ್ರಿಕೆಟ್ ತಂಡದ ಪಾಲಾಗಿದೆ! ನ. 24ರಂದು ನೈಜೀರಿಯಾ ವಿರುದ್ಧ ನೈಜೀರಿಯಾದ ಲಾಗೋಸ್ ಎಂಬಲ್ಲಿ ನಡೆದ ಪಂದ್ಯದಲ್ಲಿ ಕೇವಲ 7 ರನ್ ಗಳಿಗೆ ಆಲೌಟ್ ಆಗಿದೆ.
ಅತಿ ಕಡಿಮೆ ಮೊತ್ತಗಳನ್ನು ಪೇರಿಸಿದ ತಂಡಗಳ ಪಟ್ಟಿಯಲ್ಲೀಗ ಮೊದಲ ಸ್ಥಾನದಲ್ಲಿ ಐವರಿ ಕೋಸ್ಟ್ (7 ರನ್) ಇದ್ದರೆ, ಮಂಗೋಲಿಯಾ (10 ರನ್) ಎರಡನೇ ಸ್ಥಾನದಲ್ಲಿ ಹಾಗೂ ಐಸಲ್ ಆಫ್ ಮ್ಯಾನ್ (10) ಮೂರನೇ ಸ್ಥಾನದಲ್ಲಿದೆ.
