ಬೆಂಗಳೂರು: ರಾಜ್ಯಸಭಾ ಸದಸ್ಯರಾಗಿ ನೇಮಕಗೊಂಡ ಆರಂಭದಲ್ಲೇ ಸುಧಾಮೂರ್ತಿ ಅವರು ಕಲಾಪದಲ್ಲಿ ಪಾಲ್ಗೊಂಡು ಮಹಿಳೆಯರನ್ನು ಗರ್ಭಕಂಠ ಕ್ಯಾನ್ಸರ್‍ನಿಂದ ಪಾರು ಮಾಡುವ ನಿಟ್ಟಿನಲ್ಲಿ ಲಸಿಕಾ ಆಂದೋಲನ ಹಮ್ಮಿಕೊಳ್ಳಬೇಕಾದ ಅಗತ್ಯದ ಬಗ್ಗೆ ಪ್ರಸ್ತಾಪಿಸಿ ಗಮನ ಸೆಳೆದಿದ್ದರು. ಇದರ ಮಹತ್ವ ಮನಗಂಡು ಮಹಿಳೆಯರ ಆರೋಗ್ಯ ಸಬಲೀಕರಣದ ನಿಟ್ಟಿನಲ್ಲಿ ವಿವಿಧ ಸಂಸ್ಥೆಗಳು ಕೈಜೋಡಿಸಿ ಪ್ರಮುಖ ಉಪಕ್ರಮವೊಂದಕ್ಕೆ ಮುಂದಾಗಿವೆ.
ಇದಕ್ಕಾಗಿ ದಿವಾಕರ್ಸ್ ಸರ್ವೀಸ್ ಟ್ರಸ್ಟ್, ಹೆಚ್.ಡಿ.ಆರ್. ಹೆಲ್ತ್ ಕೇರ್ ಫೌಂಡೇಷನ್, ಆರ್ಟಿಸ್ಟ್ ಫಾರ್ ಹರ್, ಅರಸೀಕಟ್ಟೆ ಅಮ್ಮ ದೇವಸ್ಥಾನ ಟ್ರಸ್ಟ್ ಹಾಗೂ ಕರ್ನಾಟಕ ರಾಜ್ಯ ಪ್ರಸೂತಿ ಮತ್ತು ಸ್ತ್ರೀರೋಗ ಸಂಘ (ಕೆ.ಎಸ್.ಒ.ಜಿ.ಎ) ಇವು ಜಂಟಿಯಾಗಿ ಎಚ್.ಪಿ.ವಿ. ಲಸಿಕಾ ಆಂದೋಲನ ಹಮ್ಮಿಕೊಂಡಿವೆ. ‘ಹೆಣ್ಣು ಮಕ್ಕಳಿಗೆ ಲಸಿಕೆ ಹಾಕಿಸಿ ಮತ್ತು ಭವಿಷ್ಯ ಸಬಲಗೊಳಿಸಿ’ ಧ್ಯೇಯವಾಕ್ಯದಡಿ ಅರಕಲಗೂಡು ತಾಲ್ಲೂಕು ಕೊಣನೂರು ಹೋಬಳಿ ಅರಸೀಕಟ್ಟೆ ಗ್ರಾಮದಲ್ಲಿ ಲಸಿಕೆ ಹಾಕುವ ಕಾರ್ಯಕ್ರಮ ಏರ್ಪಡಿಸಿದ್ದವು.
ಕರ್ನಾಟಕ ಹಾಗೂ ಹೊರ ರಾಜ್ಯಗಳಿಗೂ ಹೆಚ್.ಪಿ.ವಿ. ಲಸಿಕಾ ಆಂದೋಲನವಿಸ್ತರಿಸಬೇಕೆಂಬ ಉದ್ದೇಶ ಹೊಂದಿರುವ ‘ಫಿಗೊ’ದ (ಅಂತಾರಾಷ್ಟ್ರೀಯ ಪ್ರಸೂತಿಮತ್ತು ಸ್ತ್ರೀರೋಗ ತಜ್ಞರ ಒಕ್ಕೂಟ) ವೆಲ್ ವಿಮೆನ್ ಹೆಲ್ತ್ ಕೇರ್ ವಿಭಾಗದ ನಿರ್ದೇಶಕರಾದ ಡಾ.ಹೇಮಾ ದಿವಾಕರ್ ಅವರು ಲಸಿಕಾ ಆಂದೋಲನ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಮಾತನಾಡಿ, ಗರ್ಭಕಂಠ ಕ್ಯಾನ್ಸರ್ ತಡೆಗಟ್ಟಲು ತ್ವರಿತ ಕ್ರಮ ಕೈಗೊಳ್ಳಬೇಕಾದ ಅಗತ್ಯವಿದೆ ಎಂದು ಒತ್ತಿ ಹೇಳಿದರು.
ಹೆಚ್.ಡಿ.ಆರ್. ಹೆಲ್ತ್ ಕೇರ್ ಫೌಂಡೇಷನ್ ನ ಡಾ.ಜಿ.ವಿ.ದಿವಾಕರ್, ಕರ್ನಾಟಕ ರಾಜ್ಯ ಪ್ರಸೂತಿ ಮತ್ತು ಸ್ತ್ರೀರೋಗ ತಜ್ಞರ ಸಂಘದ ಅಧ್ಯಕ್ಷೆ ಡಾ.ಭಾರತಿ ರಾಜ್ ಶೇಖರ್ ಮತ್ತು ರಾಜ್ಯ ಹದಿಹರೆಯದವರ ಆರೋಗ್ಯ ಸಮಿತಿ ಅಧ್ಯಕ್ಷೆ ಡಾ. ಸೌಮ್ಯ ಮಣಿ, ಅರಕೂಲಗೂಡು ಮಾಜಿ ಶಾಸಕ ಹಾಗೂ ಅರಸೀಕಟ್ಟೆ ಅಮ್ಮ ದೇವಸ್ಥಾನ ಟ್ರಸ್ಟ್ ಅಧ್ಯಕ್ಷ ಎ.ಟಿ.ರಾಮಸ್ವಾಮಿ, ಅಧ್ಯಕ್ಷೆ ಡಾ.ಗಿರಿಜಾ ಬಿ.ಎಸ್, ಸಂಯೋಜಕಿ ಡಾ.ಸಾವಿತ್ರಿ ಎ. ಉಪಸ್ಥಿತರಿದ್ದರು.
