ಟೆಲ್ ಅವೀವ್: ಇತ್ತೀಚೆಗೆ ಹೆಚ್ಚುತ್ತಿರುವ ಕ್ಷಿಪಣಿದಾಳಿ ಹಿನ್ನಲೆಯಲ್ಲಿ ಇಸ್ರೇಲ್ ಇದೇ ಮೊದಲ ಬಾರಿಗೆ ಅಮೆರಿಕ ನಿರ್ಮಿತ THAAD ವಾಯು ರಕ್ಷಣಾ ವ್ಯವಸ್ಥೆಯನ್ನು ತನ್ನ ರಕ್ಷಣೆಗೆ ನಿಯೋಜಿಸಿದೆ.
ನಿನ್ನೆ ಯೆಮೆನ್‌ನಿಂದ ಇಸ್ರೇಲ್ ಮೇಲೆ ಹಾರಿಸಲಾದ ಬ್ಯಾಲಿಸ್ಟಿಕ್ ಕ್ಷಿಪಣಿಯನ್ನು ಪ್ರತಿಬಂಧಿಸಲು ಅಮೇರಿಕನ್ ಟರ್ಮಿನಲ್ ಹೈ ಆಲ್ಟಿಟ್ಯೂಡ್ ಏರಿಯಾ ಡಿಫೆನ್ಸ್ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯನ್ನು ಇಸ್ರೇಲ್ ಬಳಸಿದೆ. ಈ ಕ್ಷಿಪಣಿಯನ್ನು ಇರಾನ್ ಬೆಂಬಲಿತ ಗುಂಪು ಹೌತಿ ಬಂಡುಕೋರರು ಹಾರಿಸಿದ್ದ ಕ್ಷಿಪಣಿಗಳನ್ನು ಹೊಡೆದುರುಳಿಸಲು ಹಾರಿಸಲಾಗಿದೆ ಎಂದು ವರದಿಯಾಗಿದೆ.
ಅಕ್ಟೋಬರ್‌ನಲ್ಲಿ ಅಮೆರಿಕ ಇಸ್ರೇಲ್ ಗೆ ತನ್ನ ಬಲಾಢ್ಯ THAAD ರಕ್ಷಣಾ ವ್ಯವಸ್ಥೆಯನ್ನು ನೀಡಿತ್ತು. ಇದೀಗ ಇದೇ ಮೊದಲ ಬಾರಿಗೆ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯನ್ನು ಇಸ್ರೇಲ್ ನಿಯೋಜಿಸಿದೆ ಎಂದು ಟೈಮ್ಸ್ ಆಫ್ ಇಸ್ರೇಲ್ ವರದಿ ಮಾಡಿದೆ. ಅಲ್ಲದೆ ಇಸ್ರೇಲ್ ಸೇನೆ ಈ THAAD System ಅನ್ನು ಸಕ್ರಿಯಗೊಳಿಸಿದ ವಿಡಿಯೋವನ್ನು ಇಸ್ರೇಲ್ ಸೇನೆ ಟ್ವೀಟ್ ಮಾಡಿದೆ.
ಅಮೆರಿಕದ ಸೈನಿಕ, ‘ಹದಿನೆಂಟು ವರ್ಷಗಳಿಂದ ನಾನು ಇದಕ್ಕಾಗಿ ಕಾಯುತ್ತಿದ್ದೇನೆ” ಎಂದು ಉದ್ಗರಿಸುವ ಧ್ವನಿ ಕೇಳುತ್ತಿದ್ದಂತೆಯೇ THAAD System ಉಡಾಯಿಸುತ್ತಿರುವುದನ್ನು ತೋರಿಸುವ ದೃಶ್ಯಗಳು ಸಾಮಾಜಿಕ ಮಾಧ್ಯಮದಲ್ಲಿ ಪ್ರಸಾರವಾಗಿವೆ. ಅಕ್ಟೋಬರ್ 1 ರಂದು ಇರಾನ್ ನಡೆಸಿದ ಬ್ಯಾಲಿಸ್ಟಿಕ್ ಕ್ಷಿಪಣಿ ದಾಳಿಯ ನಂತರ ಇದೇ ಮೊದಲ ಬಾರಿಗೆ ಇಸ್ರೇಲ್‌ನಲ್ಲಿ THAAD ನಿಯೋಜನೆ ಮಾಡಲಾಗಿದೆ. ಈ ಸುಧಾರಿತ ವ್ಯವಸ್ಥೆಯು ಭೂಮಿಯ ವಾತಾವರಣದ ಒಳಗೆ ಮತ್ತು ಹೊರಗೆ ಕ್ಷಿಪಣಿಗಳನ್ನು ಪ್ರತಿಬಂಧಿಸುವ ಸಾಮರ್ಥ್ಯವನ್ನು ಹೊಂದಿದೆ.
ಅಮೆರಿಕ ಅಭಿವೃದ್ಧಿಪಡಿಸಿದ THAAD ವ್ಯವಸ್ಥೆಯು, ಅವುಗಳ ಟರ್ಮಿನಲ್ ಹಂತದಲ್ಲಿ ಅಲ್ಪ, ಮಧ್ಯಮ ಮತ್ತು ಮಧ್ಯಮ ಶ್ರೇಣಿಯ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಪ್ರತಿಬಂಧಿಸಲು ವಿನ್ಯಾಸಗೊಳಿಸಲಾಗಿದೆ. ಸಾಂಪ್ರದಾಯಿಕ ವ್ಯವಸ್ಥೆಗಳಿಗಿಂತ ಇದು ಭಿನ್ನವಾಗಿ, THAAD ಬೆದರಿಕೆಗಳನ್ನು ತಟಸ್ಥಗೊಳಿಸಲು ಚಲನ ಶಕ್ತಿಯನ್ನು ಅವಲಂಬಿಸಿದೆ. ಸ್ಫೋಟಕ ಸಿಡಿತಲೆಗಿಂತ ಹೆಚ್ಚಾಗಿ ಒಳಬರುವ ಕ್ಷಿಪಣಿಗಳನ್ನು ಪ್ರಭಾವದ ಮೂಲಕ ನಾಶಪಡಿಸುತ್ತದೆ.
ಪ್ರಮಾಣಿತ THAAD ಬ್ಯಾಟರಿಯು ಆರು ಟ್ರಕ್-ಮೌಂಟೆಡ್ ಲಾಂಚರ್‌ಗಳನ್ನು ಒಳಗೊಂಡಿದೆ. ಪ್ರತಿಯೊಂದೂ ಎಂಟು ಪ್ರತಿಬಂಧಕ (interceptors)ಗಳನ್ನು ಹಿಡಿದಿಟ್ಟುಕೊಳ್ಳುವ ಸಾಮರ್ಥ್ಯ ಹೊಂದಿದೆ. ಜೊತೆಗೆ ರಾಡಾರ್ ಮತ್ತು ಅಗ್ನಿಶಾಮಕ ನಿಯಂತ್ರಣ ವ್ಯವಸ್ಥೆಯೂ ಇದೆ. ವ್ಯವಸ್ಥೆಯ ರಾಡಾರ್ 870 ರಿಂದ 3,000 ಕಿಲೋಮೀಟರ್ ವ್ಯಾಪ್ತಿಯಿಂದ ಬರುವ ಎಲ್ಲ ರೀತಿಯ ವಾಯು ಬೆದರಿಕೆಗಳನ್ನು ಪತ್ತೆ ಮಾಡಿ, ಆಗಸದಲ್ಲೇ ಅದನ್ನು ನಾಶ ಪಡಿಸುತ್ತದೆ.
ಇನ್ನು ಇರಾನ್ ಬೆಂಬಲಿತ ಹೌತಿ ಬಂಡುಕೋರರು ಕೇವಲ 8 ದಿನಗಳ ಅವಧಿಯಲ್ಲಿ 5ನೇ ಬಾರಿಗೆ ಇಸ್ರೇಲ್ ಮೇಲೆ ಕ್ಷಿಪಣಿ ದಾಳಿ ನಡೆಸಿದ್ದಾರೆ. ಬೆನ್ ಗುರಿಯನ್ ವಿಮಾನ ನಿಲ್ದಾಣವನ್ನು ಗುರಿಯಾಗಿಸಿಕೊಂಡು ಈ ಹಿಂದೆ ದಾಳಿ ಮಾಡಿತ್ತು. ಇದಕ್ಕೆ ಪ್ರತಿಕ್ರಿಯೆಯಾಗಿ, ಇಸ್ರೇಲಿ ಯುದ್ಧ ವಿಮಾನಗಳು ಯೆಮೆನ್‌ನಲ್ಲಿರುವ ಹೌತಿ ಬಂಡುಕೋರರ ನೆಲೆಗಳ ಮೇಲೆ ದಾಳಿ ಮಾಡಿತ್ತು. ಇದರಲ್ಲಿ ಹೆಜ್ಯಾಜ್ ವಿದ್ಯುತ್ ಸ್ಥಾವರ ಮತ್ತು ಸನಾ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿನ ಮೂಲಸೌಕರ್ಯ ಕೂಡ ಸೇರಿತ್ತು.
ಕಳೆದ ವರ್ಷ ಹೌತಿಗಳು ಇಸ್ರೇಲ್ ಮೇಲೆ 200 ಕ್ಕೂ ಹೆಚ್ಚು ಕ್ಷಿಪಣಿಗಳು ಮತ್ತು 170 ಡ್ರೋನ್‌ಗಳನ್ನು ಹಾರಿಸಿದ್ದಾರೆ ಎಂದು IDF ತಿಳಿಸಿದೆ. ಆದಾಗ್ಯೂ, ಈ ಬೆದರಿಕೆಗಳಲ್ಲಿ ಹೆಚ್ಚಿನವು ತಡೆಹಿಡಿಯಲ್ಪಟ್ಟವು. ಅಲ್ಲದೆ ಇದೇ ಹೌತಿ ಬಂಡುಕೋರರು ಈ ಗುಂಪು ಕೆಂಪು ಸಮುದ್ರದಲ್ಲಿ ವಾಣಿಜ್ಯ ಸಾಗಣೆಯನ್ನು ಅಡ್ಡಿಪಡಿಸಿದ್ದು, 100ಕ್ಕೂ ಹೆಚ್ಚು ವ್ಯಾಪಾರಿ ಹಡಗುಗಳನ್ನು ಗುರಿಯಾಗಿಸಿಕೊಂಡು ದಾಳಿ ಮಾಡಿವೆ. ಹೀಗಾಗಿ ಮುಂಜಾಗ್ರತಾ ಕ್ರಮವಾಗಿ ವಾಹಕಗಳು ಮಾರ್ಗ ಬದಲಾವಣೆ ಮಾಡಿವೆ.
