ಬೆಳಗಾವಿ: ವಿಧಾನಸಭೆ ಕಲಾಪದ ವೇಳೆ ಸಭಾಧ್ಯಕ್ಷ ಯು.ಟಿ.ಖಾದರ್ ಅವರು ಬಿಜೆಪಿಯ ವಿಜಯಪುರ ಶಾಸಕ ಬಸವನಗೌಡ ಪಾಟೀಲ್ ಯತ್ನಾಳ್‍ಗೆ ಜನ್ಮದಿನದ ಶುಭಾಶಯ ಕೋರಿದರು.
ಇಂದು ಕಲಾಪದ ವೇಳೆಯಲ್ಲಿ ಬಿಜೆಪಿಯ ರಾಜಾಜಿನಗರದ ಶಾಸಕ ಸುರೇಶ್ ಕುಮಾರ್ ಅವರು ಯತ್ನಾಳ್ ಜನ್ಮದಿನ ಪ್ರಸ್ತಾಪ ಮಾಡಿದರು.
ಈ ಸಂದರ್ಭದಲ್ಲಿ ಶುಭ ಕೋರಿದ ಸ್ಪೀಕರ್, ಸಿಟ್ಟನ್ನು ಆದಷ್ಟು ಕಡಿಮೆ ಮಾಡಿ ಎಲ್ಲರ ಜೊತೆ ಪ್ರೀತಿಯಿಂದ ಇರಿ ಎಂದು ಶುಭ ಹಾರೈಸಿದರು.ಇದೇ ಸಂದರ್ಭದಲ್ಲಿ ಯತ್ನಾಳ್ ಸಿಎಂ ಆಗಬೇಕು ಎಂಬುದು ನಮ್ಮೆಲ್ಲರ ವೈಯಕ್ತಿಕ ಆಶಯ ಎಂದು ಶುಭ ಹಾರೈಸಿದ ಸಹಕಾರ ಸಚಿವ ಕೆ.ಎನ್. ರಾಜಣ್ಣ ಹೇಳಿದಾಗ ಅವರ ಆಸೆ ಈಡೇರಲಿ ಎಂದು ಸಚಿವ ಪ್ರಿಯಾಂಕ್ ಖರ್ಗೆ ನುಡಿದರು.
ರಾಜಣ್ಣ ಅವರು ಸಿಎಂ ಆಗಲಿ ಎಂದಿದ್ದಾರೆ, ಯಾವಾಗ ಸಿಎಂ ಆಗುವುದು? ವಿರೋಧ ಪಕ್ಷದಲ್ಲಾ ಎಂದು ಕಾಲೆಳೆದ ತೇರದಾಳ ಶಾಸಕ ಸಿದ್ದು ಸವದಿನಿಮ್ಮಿಂದಲೇ ಮೊದಲು ಪ್ರಾರಂಭ ಆಗಲಿ, ಅಧಿಕಾರ ನಿಮ್ಮ ಪಕ್ಷದಲ್ಲೇ ಕೊಡಿ, ಅಲ್ಲಿ ಪ್ರಾರಂಭ ಆದರೆ ಮತ್ತೆ ಎಲ್ಲಾ ಸರಿಯಾಗುತ್ತದೆ ಖರ್ಗೆ ಪ್ರತಿಕ್ರಿಯಿಸಿದರು. ಈ ಸಂದರ್ಭದಲ್ಲಿ ಅವರು ಎಲ್ಲಿ ಖುಷಿಯಾಗಿರುತ್ತಾರೋ ಅಲ್ಲಿರಲಿ ಎಂದ ಸ್ಪೀಕರ್ ಹೇಳಿ ವಿಷಯಕ್ಕೆ ತೆರೆ ಎಳೆದರು.
