ಕೋಲ್ಕತ್ತ: ಸನ್‍ರೈಸರ್ಸ್ ಹೈದರಾಬಾದ್ ವಿರುದ್ಧ ಭಾನುವಾರ ಈಡನ್ ಗಾರ್ಡನ್‍ನಲ್ಲಿ ನಡೆದ ಪಂದ್ಯದಲ್ಲಿ ಐಪಿಎಲ್ ನೀತಿ ಸಂಹಿತೆಯನ್ನು ಉಲ್ಲಂಘಿಸಿದ ಕಾರಣಕ್ಕೆ ಕೋಲ್ಕತ್ತ ನೈಟ್ ರೈಡರ್ಸ್ ವೇಗದ ಬೌಲರ್ ಹರ್ಷಿತ್ ರಾಣಾ ಅವರಿಗೆ ಪಂದ್ಯ ಶುಲ್ಕದ ಶೇ 60ರಷ್ಟು ಮೊತ್ತವನ್ನು ದಂಡವಾಗಿ ವಿಧಿಸಲಾಗಿದೆ.
ಐಪಿಎಲ್ ನೀತಿಸಂಹಿತೆಯ 2.5ನೇ ವಿಧಿಯನ್ನು ರಾಣಾ ಉಲ್ಲಂಘಿಸಿದ್ದಾರೆ ಎಂದು ಐಪಿಎಲ್ ಹೇಳಿಕೆ ಶನಿವಾರ ತಿಳಿಸಿದೆ. ಎರಡು ಪ್ರತ್ಯೇಕ ತಪ್ಪುಗಳಿಗೆ ಶೇ 10 ಮತ್ತು ಶೇ 50 ದಂಡ ವಿಧಿಸಲಾಗಿದೆ.
ಹೈದರಾಬಾದ್ ಬ್ಯಾಟಿಂಗ್‍ನ ಆರನೇ ಓವರ್‍ನಲ್ಲಿ ಮಯಂಕ್ ಅಗರವಾಲ್ ಅವರ ವಿಕೆಟ್ ಪಡೆದ ಸಂದರ್ಭದಲ್ಲಿ 22 ವರ್ಷದ ರಾಣಾ ಮುಂದೆಬಂದು ಅವರತ್ತ ಫ್ಲೈಯಿಂಗ್ ಕಿಸ್ ಹರಿಬಿಟ್ಟಿದ್ದರು.ಅಂತಿಮ ಓವರ್‍ನಲ್ಲಿ ಎದುರಾಳಿ ಗೆಲುವಿಗೆ 13 ರನ್ ಬೇಕಾಗಿದ್ದಾಗ ರಾಣಾ ಸಂಯಮದಿಂದ ಬೌಲ್ ಮಾಡಿ ಬರೇ ಎಂಟು ರನ್ ಕೊಟ್ಟಿದ್ದರು.
