ಪ್ಯಾರಿಸ್: ಕಜಕಸ್ತಾನದ ಭರವಸೆಯ ಆಟಗಾರ್ತಿ ಎಲಿನಾ ರಿಬಾಕಿನಾ ಹಾಗೂ ರಷ್ಯಾದ ಡೇನಿಯಲ್ ಮೆಡ್ವೆಡೆವ್ ಅವರು ರೋಲ್ಯಾಂಡ್ ಗ್ಯಾರೊಸ್‍ನಲ್ಲಿ ನಡೆಯುತ್ತಿರುವ ಫ್ರೆಂಚ್ ಓಪನ್ ಟೆನಿಸ್ ಟೂರ್ನಿಯಲ್ಲಿ ಕ್ರಮವಾಗಿ ಮಹಿಳೆ ಹಾಗೂ ಪುರುಷರ ವಿಭಾಗಗಳ ಸಿಂಗಲ್ಸ್‍ನಲ್ಲಿ ಎರಡನೇ ಸುತ್ತಿಗೆ ಪ್ರವೇಶಿಸಿದರು.
ಮಂಗಳವಾರ ನಡೆದ ಮಹಿಳೆಯರ ಸಿಂಗಲ್ಸ್‍ನಲ್ಲಿ ಎಲಿನಾ 6-2, 6-3 ರಿಂದ ಬೆಲ್ಜಿಯಂನ ಗ್ರೀಟ್ ಮಿನೆನ್ ವಿರುದ್ಧ ಜಯಿಸಿದರು. 73 ನಿಮಿಷ ನಡೆದ ಹಣಾಹಣಿಯಲ್ಲಿ ವಿಂಬಲ್ಡನ್ ಮಾಜಿ ಚಾಂಪಿಯನ್ ಎಲಿನಾ ಮೇಲುಗೈ ಸಾಧಿಸಿದರು.
‘ಟೂರ್ನಿಯಲ್ಲಿ ಮರಳಿ ಬಂದು ಸ್ಪರ್ಧಿಸುತ್ತಿರುವುದು ಸಂತಸ ತಂದಿದೆ’ ಎಂದು ರಿಬಾಕಿನಾ ಪಂದ್ಯದ ನಂತರ ಹೇಳಿದರು. ಹೋದ ಸಲ ಅವರು ಅನಾರೋಗ್ಯ ದಿಂದಾಗಿ ಮೂರನೇ ಸುತ್ತಿನಿಂದ ಹಿಂದೆ ಸರಿದಿದ್ದರು.ಅವರು ಇಲ್ಲಿ ಎರಡನೇ ಸುತ್ತಿನಲ್ಲಿ ಏಂಜಲಿಕಾ ಕೆರ್ಬರ್ ಅಥವಾ ಅರಾಂತಾ ರೂಸ್ ಅವರನ್ನು ಎದುರಿಸಲಿದ್ದಾರೆ.
