ಸನ್‌ರೈಸರ್ಸ್ಗೂ ವೈಭವ್ ಸೂರ್ಯವಂಶಿಯದ್ದೇ ಭಯ!

ಹೈದರಾಬಾದ್: ಅಸ್ಥಿರ ಪ್ರದರ್ಶನದಿಂದ ಕಂಗೆಟ್ಟಿರುವ ಸನ್‌ರೈಸರ್ಸ್ ಹೈದರಾಬಾದ್ ತಂಡ ಐಪಿಎಲ್ 21ನೇ ಪಂದ್ಯದಲ್ಲಿ ಸೋಮವಾರ ಅಂಕಪಟ್ಟಿಯ ಅಗ್ರಸ್ಥಾನಿ ರಾಜಸ್ಥಾನ ರಾಯಲ್ಸ್ ತಂಡದ ಕಠಿಣ ಸವಾಲು ಎದುರಿಸಲಿದೆ. ಆಡಿದ ನಾಲ್ಕು ಪಂದ್ಯಗಳಲ್ಲಿ ಒಂದು ಜಯ ಮತ್ತು ಮೂರು ಸೋಲು ಅನುಭವಿಸಿರುವ ಇಶಾನ್ ಕಿಶನ್ ಸಾರಥ್ಯದ ಹೈದರಾಬಾದ್, ಕೇವಲ 2 ಅಂಕ ಮಾತ್ರ ಹೊಂದಿದೆ. ಆರ್‌ಸಿಬಿ, ಎಲ್‌ಎಸ್‌ಜಿ ಮತ್ತು ಪಂಜಾಬ್ ವಿರುದ್ಧ ಪರಾಭವಗೊಂಡಿರುವ ಹೈದರಾಬಾದ್, ಕೆಕೆಆರ್ ವಿರುದ್ಧ ಮಾತ್ರ ಜಯ ಗಳಿಸಿದೆ.ತಂಡದ ಹಿಂದಿನ ಪಂದ್ಯದಲ್ಲಿ ಅಭಿಷೇಕ್ ಶರ್ಮ ಬಿರುಸಿನ ಅರ್ಧ ಶತಕ ಗಳಿಸಿ ಫಾರ್ಮ್ ಕಂಡುಕೊAಡಿದ್ದಾರೆ. ಆದರೆ ಇತರ ಆಟಗಾರರು ಲಯ ಕಂಡುಕೊಳ್ಳದಿರುವುದು ತಂಡದ ಬ್ಯಾಟಿಂಗ್ ಕ್ರಮಾಂಕದ ಮೇಲೆ ಒತ್ತಡ ಹೆಚ್ಚಿಸಿದೆ. ಪಂಜಾಬ್ ಕಿಂಗ್ಸ್ ವಿರುದ್ಧ 219 ರನ್ ಗಳಿಸಿಯೂ ತಂಡ 7 ಎಸೆತಗಳು ಸೋತಿರುವುದು ದುರ್ಬಲ ಬೌಲಿಂಗ್‌ಗೆ ಸ್ಪಷ್ಟ ನಿದರ್ಶನವಾಗಿದೆ. ಬ್ಯಾಟಿಂಗ್ ಮತ್ತು ಬೌಲಿಂಗ್ ಎರಡರಲ್ಲೂ ಸ್ಥಿರತೆ ಕಾಯ್ದುಕೊಂಡಿರುವ ರಿಯಾನ್ ಪರಾಗ್ ಪಡೆಯ ಜಯದ ನಾಗಾಲೋಟಕ್ಕೆ ತಡೆಯೊಡ್ಡಬೇಕಾದರೆ, ಬ್ಯಾಟಿಂಗ್ ಮಾತ್ರವಲ್ಲ ಬೌಲಿಂಗ್ ಹಾಗೂ ಫೀಲ್ಡಿಂಗ್‌ನಲ್ಲೂ ಹೈದರಾಬಾದ್ ಸರ್ವಶ್ರೇಷ್ಠ ಪ್ರದರ್ಶನ ನೀಡಬೇಕಿದೆ.ತನ್ನ ಅದ್ಭುತ ಆಟದ ಮೂಲಕ ಕ್ರಿಕೆಟ್ ಜಗತ್ತನ್ನೇ ತನ್ನತ್ತ ಸೆಳೆದಿರುವ 15 ವರ್ಷದ ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ ಮತ್ತು ಟೀಮ್ ಇಂಡಿಯಾದ ಖಾಯಂ ಟೆಸ್ಟ್ ಆಟಗಾರ ಯಶಸ್ವಿ ಜೈಸ್ವಾಲ್ ಅವರ ಅತ್ಯುತ್ತಮ ಫಾರ್ಮ್ ನಿಂದಾಗಿ ರಾಯಲ್ಸ್ ಸತತ ನಾಲ್ಕು ಪಂದ್ಯಗಳಲ್ಲಿ ಗೆದ್ದು ಬೀಗುತ್ತಿದೆ. ಪಿಚ್ ಹೇಗಿದೆ? ಹೈದರಾಬಾದ್‌ನ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿರುವ ಪಿಚ್ ಬ್ಯಾಟಿಂಗ್‌ಗೆ ಅನುಕೂಲಕರವಾಗಿದೆ. ಉತ್ತಮ ಬೌನ್ಸ್ ಇರುವ ಈ ಟ್ರಾಕ್ ಟಿ20 ಕ್ರಿಕೆಟ್ ಗೆ ಹೇಳಿ ಮಾಡಿಸಿದಂತಿದೆ. ಔಟ್‌ಫೀಲ್ಡ್ ತ್ವರಿತವಾಗಿರುವುದರಿಂದ ರನ್ ಕದಿಯಲು ಸಹ ಸುಲಭ. ಈ ಸ್ಥಳದಲ್ಲಿ ಸರಾಸರಿ ಮೊದಲ ಇನ್ನಿಂಗ್ಸ್ ಸ್ಕೋರ್ 168 ರನ್. ಜೊತೆಗೆ ಎರಡನೇ ಇನ್ನಿಂಗ್ಸ್ ವೇಳೆ ಇಬ್ಬನಿ ಹೆಚ್ಚಿರುವ ಸಾಧ್ಯತೆ ಇರುವುದರಿಂದ ಟಾಸ್ ಗೆದ್ದವರು ಫೀಲ್ಡಿಂಗ್ ಆಯ್ದುಕೊಳ್ಳುವ ಸಾಧ್ಯತೆಯೇ ಹೆಚ್ಚು.