ಪಾಕ್ ತಂಡಕ್ಕೆ ಬಾಂಗ್ಲಾದಲ್ಲೂ ಮುಖಭಂಗ

ಐಸಿಸಿ ಟಿ20 ವಿಶ್ವಕಪ್ ನಲ್ಲಿ ಕಳಪೆ ಪ್ರದರ್ಶನ ನೀಡಿದ್ದ ಹಿನ್ನೆಲೆಯಲ್ಲಿ ತಮ್ಮ ದೇಶದ ಕ್ರಿಕೆಟ್ ಪ್ರೇಮಿಗಳಿಂದ ಈಗಾಗಲೇ ಛೀಮಾರಿ ಹಾಕಿಸಿಕೊಂಡಿರುವ ಪಾಕಿಸ್ತಾನ ತಂಡ ಇದೀಗ ಬಾಂಗ್ಲಾದೇಶ ಪ್ರವಾಸದ ಮೊದಲನೇ ಪಂದ್ಯದಲ್ಲೇ ಹೀನಾಯ ಸೋಲು ಕಂಡಿದೆ. ಮಧ್ಯಮ ವೇಗಿ ನಹೀದ್ ರಾಣಾ, ಸ್ಪಿನ್ನರ್ ಮೆಹೆದಿ ಹಸನ್ ಮಿರಾಜ್, ಬ್ಯಾಟರ್ ತಾನ್ಝಿದ್ ಹಸನ್ ಅವರ ಉತ್ತಮ ಪ್ರದರ್ಶನದ ಹಿನ್ನೆಲೆಯಲ್ಲಿ ಬಾಂಗ್ಲಾದೇಶ ತಂಡವು ಏಕದಿನ ಪಂದ್ಯದಲ್ಲಿ 8 ವಿಕೆಟ್ ಗಳ ಭರ್ಜರಿ ಜಯ ದಾಖಲಿಸಿತು.
ಪಾಕಿಸ್ತಾನ ತಂಡದ ಈ ಸೋಲು ಸಾಮಾಜಿಕ ಜಾಲತಾಣದಲ್ಲಿ ಬಹಳ ಟ್ರೋಲ್ ಆಗಿದೆ ಐಸಿಸಿ ವಿಶ್ವಕಪ್ ನಲ್ಲಿ ಕಳಪೆ ಪ್ರದರ್ಶನ ನೀಡಿದ್ದಕ್ಕೆ ಆಟಗಾರರಿಗೆ ಪಾಕಿಸ್ತಾನ ಕ್ರಿಕಟ್ ಮಂಡಳಿಯು 50 ಲಕ್ಷ ರೂ ದಂಡ ವಿಧಿಸಿತ್ತು. ಇದೀಗ ಮತ್ತೆ 50 ಲಕ್ಷ ರೂಪಾಯಿ ದಂಡ ಹಾಕಿದರೆ ಪರಿಸ್ಥಿತಿ ಸುಧಾರಿಸಬಹುದು ಎಂದು ನೆಟ್ಟಿಗರು ವ್ಯಂಗ್ಯವಾಡಿದ್ದಾರೆ.
ಮಿರ್ಪುರದಲ್ಲಿ ನಡೆದ ಪ್ರಥಮ ಏಕದಿನ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಪಾಕಿಸ್ತಾನ ತಂಡ ಕೇವಲ 10.4 ಓವರ್ ಗಳಾಗುವಷ್ಟರಲ್ಲಿ 114 ರನ್ ಗಳಿಗೆ ಸರ್ವಪತನ ಕಂಡಿತು. ಇದಕ್ಕುತ್ತರವಾಗಿ ಬಾಂಗ್ಲಾದೇಶ ತಂಡ ಇನ್ನೂ 209 ಎಸೆತಗಳು ಬಾಕಿ ಇರುವಂತೆಯೇ 2 ವಿಕೆಟ್ ಕಳೆದುಕೊಂಡು ಗುರಿ ತಲುಪಿತು.
ಬಾಂಗ್ಲಾದೇಶದ ಪರ ಆರಂಭಿಕ ಬ್ಯಾಟರ್ ತಾನ್ಝಿದ್ ಹಸನ್ ಕೇವಲ 42 ಎಸೆತಗಳಲ್ಲಿ 7 ಬೌಂಡರಿ ಮತ್ತು 5 ಸಿಕ್ಸರ್ ಗಳನ್ನೊಳಗೊಂಡ ಅಜೇಯ 67 ರನ್ ಬಾರಿಸಿದರು. ಅವರು ನಜ್ಮುಲ್ ಹೊಸೈನ್ (33 ಎಸೆತದಲ್ಲಿ 27 ರನ್) ಅವರೊಂದಿಗೆ 2ನೇ ವಿಕೆಟ್ ಗೆ 82 ರನ್ ಗಳ ಜೊತೆಯಾಟವಾಡಿದರು. ಅಲ್ಲಿಗೆ ಬಾಂಗ್ಲಾದೇಶದ ಗೆಲುವು ಪಕ್ಕಾ ಆಯಿತು.
ಇದಕ್ಕೂ ಮೊದಲು ಟಾಸ್ ಸೋತು ಬ್ಯಾಟಿಂಗ್ ಗೆ ಇಳಿಸಲ್ಪಟ್ಟ ಪಾಕಿಸ್ತಾನ ತಂಡ ಮೆಹಿದಿ ಹಸನ್ ಮತ್ತು ನಹೀದ್ ರಾಣಾ ಅವರ ಮಾರಕ ಬೌಲಿಂಗ್ ಗೆ ತತ್ತರಿಸಿತು. ಆರಂಭಕಾರ ಸಹೀಬಾ ಝಾದಾ ಫರ್ಹಾನ್ (38 ಎಸೆತಗಳಲ್ಲಿ 27 ರನ್) ಮತ್ತು ಫಹೀಮ್ ಅಶ್ರಫ್ (47 ಎಸೆತಗಳಲ್ಲಿ 37 ರನ್) ಹೊರತುಪಡಿಸಿದರೆ ಬೇರಾವ ಆಟಗಾರ ಸಹ ನಿಂತು ಆಡಲು ಯಶಸ್ವಿಯಾಗಲಿಲ್ಲ. ಮಧ್ಯಮ ಕ್ರಮಾಂಕದ ಬ್ಯಾಟರ್ ಗಳ ತೀವ್ರ ವೈಫಲ್ಯದಿಂದಾಗಿ ತಂಡ 100ರ ಗಡಿ ದಾಟುವುದೇ ಕಷ್ಟಕರ ಎಂಬ ಪರಿಸ್ಥಿತಿ ಇತ್ತು. ಈ ಹಂತದಲ್ಲಿ ಫಹೀಮ್ ಅಶ್ರಫ್ ಅವರು ಕೊಂಚ ಪ್ರತಿರೋಧ ತೋರಿದ್ದರಿಂದ ಮೂರಂಕೆ ದಾಟಿತು.