ಭಾರತೀಯ ಕ್ರಿಕೆಟ್ ಲೋಕದಲ್ಲಿ ಇತ್ತೀಚೆಗೆ ನಡೆದ ಅತ್ಯಂತ ಹೃದಯಸ್ಪರ್ಶಿ ಘಟನೆಗಳಲ್ಲಿ ಒಂದು. ಮಹೇಂದ್ರ ಸಿಂಗ್ ಧೋನಿ ಅವರು ತಮ್ಮ ಮಾಜಿ ಸಹ ಆಟಗಾರ ವಿರಾಟ್ ಕೊಹ್ಲಿ ಅವರನ್ನು ತಮ್ಮ ಕಾರಿನಲ್ಲಿ ಕರೆದೊಯ್ದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ದೊಡ್ಡ ಸಂಚಲನ ಮೂಡಿಸಿದೆ. ದಕ್ಷಿಣ ಆಫ್ರಿಕಾ ವಿರುದ್ಧ ನವೆಂಬರ್ ೩೦ರಂದು ನಡೆಯಲಿರುವ ಪ್ರಥಮ ಏಕದಿನ ಪಂದ್ಯವನ್ನು ಆಡುವ ಸಲುವಾಗಿ ರಾಂಚಿಗೆ ಆಗಮಿಸಿರುವ ವಿರಾಟ್ ಕೊಹ್ಲಿ ಅವರು ಧೋನಿ ಅವರ ಮನೆಗೆ ಭೋಜನಕೂಟಕ್ಕಾಗಿ ಆಗಮಿಸಿದ್ದರು. ಭೋಜನದ ನಂತರ ಧೋನಿ ಅವರು ಕೊಹ್ಲಿ ಅವರನ್ನು ಭಾರತ ತಂಡದ ಹೋಟೆಲ್‌ಗೆ ಕಾರಿನಲ್ಲಿ ಕರೆದುಕೊಂಡು ಹೋಗಿದ್ದರು.
ಗುರುವಾರ ರಾತ್ರಿ ನಡೆದ ಈ ಘಟನೆಯ ವಿಡಿಯೋವನ್ನು ಅಭಿಮಾನಿಗಳು ಸಾಮಾಜಿಕ ಜಾಲತಾಣ ಎಕ್ಸ್ ನಲ್ಲಿ ಹಂಚಿಕೊಂಡಿದ್ದು ಇದೀಗ ವೈರಲ್ ಆಗಿದೆ. ಧೋನಿ ಅವರು ತಮ್ಮ SUV
ಕಾರನ್ನು ಚಲಾಯಿಸುತ್ತಿದ್ದರೆ, ಕೊಹ್ಲಿ ಅವರು ಪಕ್ಕದ ಸೀಟಿನಲ್ಲಿ ಕುಳಿತಿದ್ದರು. ಇದು ಬಹಳ ಅಪರೂಪದ, ಆದರೆ ಬಹಳಷ್ಟು ನೆನಪುಗಳನ್ನುಮೆಲುಕು ಹಾಕುವ ದೃಶ್ಯವಾಗಿತ್ತು.
ಏನಿದು ಘಟನೆ?
ಕ್ಯಾಪ್ಟನ್ ಕೂಲ್ ಮಹೇಂದ್ರ ಸಿಂಗ್ ಧೋನಿ ಅವರು ಟೀಂ ಇಂಡಿಯಾ ವಿಕೆಟ್ ಕೀಪರ್ ಬ್ಯಾಟರ್ ರಿಷಭ್ ಪಂತ್ ಅವರೊಂದಿಗೆ ನವೆಂಬರ್ ೨೭ರಂದು ರಾಂಚಿಯ ತಮ್ಮ ಫಾರ್ಮ್ಹೌಸ್‌ನಲ್ಲಿ ಭೋಜನಕೂಟ ಏರ್ಪಡಿಸಿದ್ದರು. ಸಂಜೆ ವೇಳೆ ವಿರಾಟ್ ಕೊಹ್ಲಿ ಅವರು ಧೋನಿ ಅವರ ನಿವಾಸವನ್ನು ಪ್ರವೇಶಿಸುತ್ತಿದ್ದಂತೆ ಅಭಿಮಾನಿಗಳು ಗುರುತಿಸಿದರು. ಇದರ
ವಿಡಿಯೋ ಅಂತರ್ಜಾಲದಲ್ಲಿ ಹರಿದಾಡಿ ದೊಡ್ಡ ಸುದ್ದಿಯಾಯಿತು. ಕೆಲ ಗಂಟೆಗಳ ನಂತರ ಧೋನಿ ಅವರು ಕೊಹ್ಲಿಯನ್ನು ಹೋಟೆಲ್‌ಗೆ ಕರೆದುಕೊಂಡು ಹೋದರು. ಯಾವುದೇ ಭದ್ರತಾ
ಸಿಬ್ಬಂದಿ ಇಲ್ಲದೆ, ಯಾವುದೇ ಆಡಂಬರವಿಲ್ಲದೆ, ಸುಮಾರು ಒಂದು ದಶಕಕ್ಕೂ ಹೆಚ್ಚು ಕಾಲ ಭಾರತೀಯ ಕ್ರಿಕೆಟ್ ಅನ್ನು ರೂಪಿಸಿದ ಅವರ ಸುದೀರ್ಘ ಪಾಲುದಾರಿಕೆಯ ನೆನಪುಗಳನ್ನು
ಈ ದೃಶ್ಯ ಪುನರುಜ್ಜೀವನಗೊಳಿಸಿತು.
ಈ ವಿಡಿಯೋವನ್ನು ಹಂಚಿಕೊಂಡಿರುವ ಸ್ಟಾರ್ ಸ್ಪೋರ್ಟ್ಸ್‌, ಇದಕ್ಕೆ”ವರ್ಷದ ಪುನರ್ಮಿಲನ” (Re union of the year ) ಎಂದು ಶೀರ್ಷಿಕೆ ನೀಡಿದೆ. ರಾಂಚಿಯಲ್ಲಿ ವಿರಾಟ್ ಗೆ ಮೊದಲ ಪಂದ್ಯ ದಕ್ಷಿಣ ಆಫ್ರಿಕಾ ವಿರುದ್ಧ ಮೂರು ಪಂದ್ಯಗಳ ಏಕದಿನ ಸರಣಿಯನ್ನು ಆಡಲು ವಿರಾಟ್ ಕೊಹ್ಲಿ ಅವರು ಲಂಡನ್ ನ ತಮ್ಮ ನಿವಾಸದಿಂದ ಭಾರತಕ್ಕೆ ಮರಳಿದ್ದಾರೆ. ನವೆಂಬರ್ ೩೦ರಂದು ರಾಂಚಿಯಲ್ಲಿ ಪ್ರಥಮ ಏಕದಿನ ಪಂದ್ಯ ನಡೆಯಲಿದೆ. ಬಳಿಕ ಡಿಸೆಂಬರ್ ೩ರಂದು ರಾಯಪುರದಲ್ಲಿ ೨ನೇ ಏಕದಿನ, ೬ರಂದು ವಿಶಾಖಪಟ್ಟಣದಲ್ಲಿ ೩ನೇ
ಏಕದಿನ ಪಂದ್ಯಗಳು ನಡೆಯಲಿವೆ. ಇದು ವಿರಾಟ್ ಕೊಹ್ಲಿ ಅವರು ರಾಂಚಿಯಲ್ಲಿ ಆಡುತ್ತಿರುವ ಮೊದಲ ಅಂತಾರಾಷ್ಟ್ರೀಯ ಪಂದ್ಯವಾಗಿದೆ. ಫೆಬ್ರವರಿ ೨೦೨೪ ರಲ್ಲಿ ಇಂಗ್ಲೆಂಡ್ ವಿರುದ್ಧ ಇಲ್ಲಿ ಟೆಸ್ಟ್ ಪಂದ್ಯ ನಡೆದಾಗ ಅವರು ತಮ್ಮ ಪುತ್ರ ಅಕಾಯ್ ಜನನದ ಕಾರಣದಿಂದಾಗಿ ಗೈರು ಹಾಜರಾಗಿದ್ದರು.
