ತಿ.ನರಸೀಪುರ: ಎಬಿ ಇನ್ ಬಿಇವಿ ಉತ್ಪನ್ನ ಬಿಯರ್ ಕಾರ್ಖಾನೆಯಲ್ಲಿ ಕಾರ್ಮಿಕರ ಶೋಷಣೆ ಹಾಗೂ ದಲಿತ ಕಾರ್ಮಿಕರನ್ನು ತೆಗೆದು ಅಕ್ರಮವಾಗಿ ನೀರು ಸರಬರಾಜು ಮಾಡಿಕೊಳ್ಳುತ್ತಿದ್ದಾರೆಂದು ದಸಂಸ ತಾಲೂಕು ಸಂಚಾಲಕ ಕುಕ್ಕೂರು ರಾಜು ಆರೋಪ ಮಾಡಿದರು.
ಪಟ್ಟಣದ ಎಪಿಎಂಸಿ ಆವರಣದಲ್ಲಿ ಸುದ್ದಿಗಾರರೊಡನೆ ಮಾತನಾಡಿ, ತಾಲೂಕಿನ ಮಲಿಯೂರು ಗ್ರಾಪಂ ವ್ಯಾಪ್ತಿಯಲ್ಲಿ ಬರುವ ಬಿಯರ್ ಫ್ಯಾಕ್ಟರಿಯಲ್ಲಿ ಕಾರ್ಮಿಕರನ್ನು ಹನ್ನೆರೆಡು ಗಂಟೆಗಳ ಕಾಲ ದುಡಿಸಿಕೊಳ್ಳುತ್ತಿದ್ದಾರೆ. ಹೆಚ್ಚಿನ ಸಮಯ ದುಡಿದ ಕೆಲಸಕ್ಕೆ ಒಟಿ ನೀಡುತ್ತಿಲ್ಲ. ಪ್ರಶ್ನೆ ಮಾಡಿದವರನ್ನು ಕಾರಣವಿಲ್ಲದೇ ಏಕಾಏಕಿ ಕೆಲಸದಿಂದ ತೆಗೆದು ಹಾಕಲಾಗುತ್ತಿದೆ ಎಂದು ದೂರಿದರು.
ಕಾನೂನಿಗನುಗುಣವಾಗಿ ಫ್ಯಾಕ್ಟರಿ ನಿಯಮಾನುಸಾರ ನಡೆಸುತ್ತಿಲ್ಲ, ಈಗಾಗಲೇ ಅನೇಕ ದಲಿತ ಕಾರ್ಮಿಕರನ್ನು ತೆಗೆದು ಹಾಕಿದ್ದು ಸ್ಥಳೀಯರಿಗೆ ಉದ್ಯೋಗ ನೀಡುತ್ತಿಲ್ಲ, ಬಿಯರ್ ತಯಾರಿಸಲು ಉಪಯೋಗಿಸುವ ಉತ್ಪನ್ನಗಳನ್ನು ಡಿಸ್ಪ್ಲೇ ಕೂಡ ಮಾಡಿಲ್ಲ ಹಾಗೂ ಬಹು ಮುಖ್ಯವಾಗಿ ಕೃಷಿಗೆ ಬಳಸಲಾಗುತ್ತಿರುವ ರೈತರ ಪಂಪ್ಸೆಟ್ನಿಂದ ಹಣ ಕೊಟ್ಟು ನೂರಾರು ಟ್ಯಾಂಕರ್ಗಳಿಂದ ನೀರನ್ನು ಅಕ್ರಮವಾಗಿ ಬಳಸಿಕೊಳ್ಳಲಾಗುತ್ತಿದೆ ಎಂದು ದೂರಿದರು.
ಪರಿಸರಕ್ಕೆ ಹಾನಿ: ಜಿಲ್ಲಾಡಳಿತ, ತಾಲ್ಲೂಕು ಆಡಳಿತ ಹಾಗೂ ಕಾರ್ಮಿಕ ಇಲಾಖೆ ಬಿಯರ್ ಫ್ಯಾಕ್ಟರಿ ಅವರು ಮಾನದಂಡಗಳನ್ನು ಗಾಳಿಗೆ ತೂರಿ ಪರಿಸರಕ್ಕೆ ಹಾನಿಯುಂಟು ಮಾಡುತ್ತಿದ್ದರೂ ಕಣ್ಣು ಮುಚ್ಚಿ ಕುಳಿತಿರುವುದು ಅನುಮಾನಕ್ಕೆ ಕಾರಣವಾಗಿದೆ. ಕೂಡಲೇ ಸಂಬಂಧಿಸಿದ ಇಲಾಖೆಗಳು ಕ್ರಮ ಕೈಗೊಳ್ಳದಿದ್ದರೆ ಬಿಯರ್ ಫ್ಯಾಕ್ಟರಿ ಮುಂಭಾಗ ದಸಂಸ ಪ್ರತಿಭಟನಾ ಧರಣಿ ನಡೆಸುತ್ತದೆಂದು ಎಚ್ಚರಿಸಿದರು.ಈ ಸಂದರ್ಭದಲ್ಲಿ ತಾಲೂಕು ಸಂಘಟನಾ ಸಂಚಾಲಕರಾದ ಹ್ಯಾಕನೂರು ರಾಜಪ್ಪ, ರಂಗಸಮುದ್ರ ನಂಜುಂಡ, ದೇವರಾಜು, ಯಾಚೇನಹಳ್ಳಿ ಚಿನ್ನಸ್ವಾಮಿ, ಹಿರಿಯೂರು ನಾಗರಾಜು ಇದ್ದರು
