ಹುಬ್ಬಳ್ಳಿ: ಕೇಂದ್ರ ಸಚಿವ, ಬಿಜೆಪಿ ಅಭ್ಯರ್ಥಿ ಪ್ರಲ್ಹಾದ ಜೋಶಿ ಅವರ ಚಿತ್ತ ಈಗ ವಾಯು ವಿಹಾರಿಗಳತ್ತ !ಚುನಾವಣೆಗಿನ್ನು ಕೆಲವೇ ದಿನಗಳು ಉಳಿದಿದ್ದು, ಸಚಿವರು ಪ್ರಚಾರದ ಆಯಾಮವನ್ನು ವಿಸ್ತರಿಸತೊಡಗಿದ್ದಾರೆ. ಈಗ ಬೆಳಕು ಹರಿಯುತ್ತಲೇ ಮೊದಲು ಒಂದು ಸುತ್ತು ಹುಬ್ಬಳ್ಳಿ-ಧಾರವಾಡದ ಪಾರ್ಕ್ ಗಳತ್ತ ಹೆಜ್ಜೆ ಹಾಕುತ್ತಿದ್ದಾರೆ.
ಬಿರು ಬಿಸಿಲು ಎಂಬ ಕಾರಣಕ್ಕೆ ಚುನಾವಣಾ ಪ್ರಚಾರಕ್ಕೆ ತೊಡಕಾಗದಂತೆ ಬೆಳಗ್ಗೆ ಮತ್ತು ಸಂಜೆ ವೇಳೆಯೇ ಹೆಚ್ಚು ಪ್ರಚಾರದಲ್ಲಿ ಸಕ್ರಿಯರಾಗಿದ್ದಾರೆ.
ಬೆಳಗ್ಗೆ ಮತ್ತು ರಾತ್ರಿ ನಗರ ಪ್ರದೇಶದಲ್ಲಿ ಹಾಗೂ ಸಂಜೆ ವಿಧಾನಸಭಾ ಕ್ಷೇತ್ರವಾರು ವಿವಿಧ ಹಳ್ಳಿಗಳಲ್ಲಿ ರೋಡ್ ಶೋ ನಡೆಸುತ್ತಿದ್ದಾರೆ.ಅಂತೆಯೇ, ನಿತ್ಯ ಬೆಳ ಬೆಳಗ್ಗೆಯೇ ಸಚಿವ ಜೋಶಿ ಅವರು ವಿವಿಧ ಪಾರ್ಕ್, ಉದ್ಯಾನವನಗಳಲ್ಲಿ ವಾಯು ವಿಹಾರಿಗಳ ಬಳಿ ತಲುಪುತ್ತಿದ್ದಾರೆ. ಇಂದು ಬೆಳಗ್ಗೆ ಹುಬ್ಬಳ್ಳಿಯ ನೃಪತುಂಗಾ ಬೆಟ್ಟದಲ್ಲಿ ವಾಯು ವಿಹಾರಕ್ಕೆಂದು ಬಂದವರನ್ನು ಭೇಟಿ ಮಾಡಿ ಮತ ಕೋರಿದರು.
ಭಾರತವನ್ನು ವಿಶ್ವ ಗುರುವಾಗಿಸಲು ನರೇಂದ್ರ ಮೋದಿ ಅವರನ್ನು ಮತ್ತೆ ಪ್ರಧಾನಿಯನ್ನಾಗಿಸಿ, ಇದಕ್ಕಾಗಿ ಬಿಜೆಪಿ ಬೆಂಬಲಿಸಿ ಎಂದು ಮನವಿ ಮಾಡಿದರು.
ಈ ಸಂದರ್ಭದಲ್ಲಿ ಶಾಸಕರಾದ ಮಹೇಶ ಟೆಂಗಿನಕಾಯಿ, ಮಹಾನಗರ ಪಾಲಿಕೆ ಸದಸ್ಯರಾದ ವೀರಣ್ಣ ಸವಡಿ, ಸಂತೋಷ ಚೌಹಾನ್, ರೂಪಾ.ಡಿ.ಶೆಟ್ಟಿ, ಚನ್ನು ಹೊಸಮನಿ, ಸಿದ್ದು ಮೊಗಳಿಶೆಟ್ಟರ್, ಶಿವಯ್ಯ ಹಿರೇಮಠ, ಈಶ್ವರಗೌಡ ಪಾಟೀಲ ಹಾಗೂ ಕಾರ್ಯಕರ್ತರು ಉಪಸ್ಥಿತರಿದ್ದರು.
