ಆರಂಭಿಕ ಆಟಗಾರ್ತಿ ಪ್ರತೀಕಾ ರಾವಲ್(89), ಮಧ್ಯಮ ಕ್ರಮಾಂಕದ ತೇಜಲ್ ಹಸಬ್ನಿಸ್(53) ಮತ್ತು ನಾಯಕಿ ಸ್ಮೃತಿ ಮಂದಾನ ಅವರ ಭರ್ಜರಿ ಬ್ಯಾಟಿಂಗ್ ನಿಂದಾಗಿ ಭಾರತ ಮಹಿಳೆಯರ ತಂಡ ಐರ್ಲೆಂಡ್ ತಂಡದ ವಿರುದ್ಧ 6 ವಿಕೆಟ್ ಗಳ ಭರ್ಜರಿ ಜಯ ಸಾಧಿಸಿದೆ. ಇದರೊಂದಿಗೆ ಸ್ಮೃತಿ ಮಂದಾನ ಏಕದಿನ ಕ್ರಿಕೆಟ್ ನಲ್ಲಿ 4000 ರನ್ ಗಡಿ ದಾಟುವ ಮೂಲಕ ಹೊಸ ಇತಿಹಾಸ ನಿರ್ಮಿಸಿದ್ದಾರೆ.
ಗೆಲ್ಲಲು 239 ರನ್ ಗಳ ಗುರಿ ಪಡೆದಿದ್ದ ಭಾರತ ತಂಡಕ್ಕೆ ಸ್ಮೃತಿ ಮಂದಾನ ಮತ್ತು ಪ್ರತೀಕಾ ರಾವಲ್ ಸ್ಫೋಟಕ ಆರಂಭ ನೀಡಿದರು. ಸ್ಮೃತಿ ಮಂದಾನ ಅವರು ಕೇವಲ 29 ಎಸೆತಗಳಲ್ಲಿ ವೇಗದ 41 ರನ್ ಗಳಿಸಿ ಔಟಾದರು.ಅವರು ಈ ಸಂದರ್ಭದಲ್ಲಿ ಏಕದಿನ ಕ್ರಿಕೆಟ್ ನಲ್ಲಿ 4000 ರನ್ ಪೂರೈಸಿದ ಎರಡನೇ ಆಟಗಾರ್ತಿ ಎಂಬ ಗೌರವಕ್ಕೆ ಪಾತ್ರರಾದರು. ಮಹಿಳಾ ಕ್ರಿಕೆಟ್ ನ ದಂತಕತೆ ಮಿತಾಲಿ ರಾಜ್ ಈ ಸಾಧನೆ ಮಾಡಿದ ಮೊದಲ ಭಾರತೀಯ ಆಟಗಾರ್ತಿಯಾಗಿದ್ದಾರೆ. ಮಿತಾಲಿ ರಾಜ್ ಅವರು ಈ ಸಾಧನೆಗೆ 112 ಇನ್ನಿಂಗ್ಸ್ ಗಳನ್ನು ತೆಗೆದುಕೊಂಡಿದ್ದರೆ, ಸ್ಮೃತಿ ಮಂದಾನ ಅವರು ಕೇವಲ 95 ಇನ್ನಿಂಗ್ಸ್ ಗಳಲ್ಲೇ ಈ ಗಡಿ ತಲುಪಿದರು.
ಇನ್ನು ಸ್ಮೃತಿ ಮಂದಾನ ಅವರು ಅತಿ ಕಡಿಮೆ ಇನ್ನಿಂಗ್ಸ್ ಗಳಲ್ಲಿ 4000 ರನ್ ಗಡಿ ದಾಟಿದ ವಿಶ್ವದ 3ನೇ ಆಟಗಾರ್ತಿಯಾಗಿದ್ದಾರೆ. ಈ ಹಿಂದೆ ಆಸ್ಟ್ರೇಲಿಯಾದ ಬೆಲಿಂಡಾ ಕ್ಲಾರ್ಕ್ 86 ಇನ್ನಿಂಗ್ಸ್ ಗಳಲ್ಲಿ ಮತ್ತು ಮೆಗ್ ಲ್ಯಾನಿಂಗ್ 87 ಇನ್ನಿಂಗ್ಸ್ ಗಳಲ್ಲಿ ಈ ಸಾಧನೆ ಮಾಡಿದ್ದರು. ಸ್ಮೃತಿ ಮಂದಾನ ಅವರೊಂದಿಗೆ ಯುವ ಆಟಗಾರ್ತಿ ಪ್ರತೀಕಾ ರಾವಲ್ (89) ಅವರು ಮೊದಲ ವಿಕೆಟ್ ಗೆ 70 ರನ್ ಗಳ ಜೊತೆಯಾಟವಾಡಿದರು.
ಸ್ಮೃತಿ ಮಂದಾನ ಔಟಾದ ಬಳಿಕ ಹರ್ಲಿನ್ ಡಿಯೋಲ್ (20), ಜೆಮಿಮಾ ರೋಡ್ರಿಗಸ್(9) ಮತ್ತು ಜೇಜಲ್ ಹಸಬ್ನಿಸ್ (ಅಜೇಯ 53) ಅವರೊಂದಿಗೆ ವಿವಿಧ ಜೊತೆಯಾಟಗಳಲ್ಲಿ ಪಾಲ್ಗೊಂಡ ಪ್ರತೀಕಾ ತಂಡದ ಮೊತ್ತ 232 ಆಗಿದ್ದಾಗ ವಿಕೆಟ್ ಒಪ್ಪಿಸಿದರು. ಆದರೆ ಆಗಲೇ ಭಾರತ ತಂಡದ ಜಯ ಖಚಿತವಾಗಿತ್ತು. ನಾಯಕಿಯಾಟ ಆಡಿದ ಲೆವಿಲ್: ಇದಕ್ಕೂ ಮೊದಲು ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ದುಕೊಂಡ ಐರ್ಲೆಂಡ್ ತಂಡದ ನಾಯಕಿ ಗ್ಯಾಬಿ ಲೆವಿಲ್ ಅವರ 92 ರನ್ ಗಳ ಸಹಾಯದಿಂದ 7 ವಿಕೆಟ್ ನಷ್ಟಕ್ಕೆ 238 ರನ್ ಗಳ ಸ್ಪರ್ಧಾತ್ಮಕ ಮೊತ್ತ ಗಳಿಸಿತು.
