ಮುಂಬೈ: ಆತಿಥೇಯ ಯು ಮುಂಬಾ ತಂಡ,ಪ್ರೊ ಕಬಡ್ಡಿ ಲೀಗ್‍ನ 10ನೇ ಆವೃತ್ತಿಯ ಪಂದ್ಯದಲ್ಲಿ ಶುಕ್ರವಾರ 40-35ರಲ್ಲಿ ಐದು ಪಾಯಿಂಟ್‍ಗಳಿಂದ ಬೆಂಗಳೂರು ಬುಲ್ಸ್ ತಂಡವನ್ನು ಸೋಲಿಸಿ ತವರಿನ ಚರಣದಲ್ಲಿ ಶುಭಾರಂಭ ಮಾಡಿತು.
ಆಲ್‍ರೌಂಡ್ ಆಟಗಾರ ಅಮೀರ್ ಮೊಹಮ್ಮದ್ ಜಫರ್‍ದಾನೇಶ್ (7 ಪಾಯಿಂಟ್) ಮತ್ತು ರೈಡರ್ ಗುಮನ್ ಸಿಂಗ್ (7) ಮುಂಬೈ ಪರ ಹೆಚ್ಚು ಅಂಕ ತಂದುಕೊಟ್ಟರು.ಬುಲ್ಸ್ ಪರ ರೈಡರ್ ಸುಶೀಲ್ ಮತ್ತು ಸಚಿನ್ ನರ್ವಾಲ್ ತಲಾ ಆರು ಪಾಯಿಂಟ್ ಗಳಿಸಿದರು. ಆದರೆ ಇತರ ರೈಡರ್‍ಗಳು ವಿಫಲರಾದರು. ಮುಂಬೈ ಐದನೇ ಸ್ಥಾನದಲ್ಲಿದ್ದರೆ, 11 ಪಂದ್ಯಗಳಲ್ಲಿ ಏಳನ್ನು ಸೋತ ಬುಲ್ಸ್ ಎಂಟನೇ ಸ್ಥಾನದಲ್ಲಿದೆ.
ಡೆಲ್ಲಿಗೆ ರೋಚಕ ಜಯ: ಇನ್ನೊಂದು ಪಂದ್ಯದಲ್ಲಿ ದಬಾಂಗ್ ಡೆಲ್ಲಿ ಕೆಸಿ 38-37 ರಲ್ಲಿ ಪಟ್ನಾ ಪೈರೇಟ್ಸ್ ಮೇಲೆ ಒಂದು ಪಾಯಿಂಟ್‍ನ ರೋಮಾಂಚಕ ಜಯ ಪಡೆಯಿತು. ಈ ಗೆಲುವಿನ ಮೂಲಕ ಡೆಲ್ಲಿ ತಂಡ 35 ಪಾಯಿಂಟ್‍ಗಳೊಡನೆ ಎರಡನೇ ಸ್ಥಾನಕ್ಕೆ ಜಿಗಿಯಿತು.
