ಗಿಲ್-ಇಶಾನ್ ಕಿಶನ್ ಶತಕಕ್ಕೆ ತಲೆಬಾಗಿದ ಅಫ್ಘಾನಿಸ್ತಾನ

ನಾಯಕ ಶುಭಮನ್ ಗಿಲ್ ಮತ್ತು ಇಶಾನ್ ಕಿಶಾನ್ ಅವರ ಅಮೋಘ ಶತಕಗಳ ನೆರವಿನಿಂದ ರನ್ ಪರ್ವತವನ್ನೇ ಕಲೆ ಹಾಕಿದ ಭಾರತ ತಂಡ ಅಫ್ಘಾನಿಸ್ತಾನದ ವಿರುದ್ಧ 2ನೇ ಏಕದಿನ ಪಂದ್ಯವನ್ನು 170 ರನ್ ಗಳ ಬೃಹತ್ ಅಂತರದಿAದ ಜಯಗಳಿಸಿದೆ. ಜೊತೆಗೆ 3 ಪಂದ್ಯಗಳ ಏಕದಿನ ಸರಣಿಯನ್ನು ಇನ್ನೂ ಒಂದು ಪಂದ್ಯ ಇರುವಾಗಲೇ ತನ್ನದಾಗಿಸಿಕೊಂಡಿದೆ.
ಲಖನೌನ ಏಕನಾ ಕ್ರೀಡಾಂಗಣದಲ್ಲಿ ಜೂನ್ 17ರ ಬುಧವಾರದಂದು ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ತಂಡ 49. 5 ಓವರ್ ಗಳಲ್ಲಿ ಎಲ್ಲಾ ವಿಕೆಟ್ ಕಳೆದುಕೊಂಡು 402 ರನ್ ಪೇರಿಸಿತು. ಇದಕ್ಕುತ್ತರವಾಗಿ ಅಫ್ಘಾನಿಸ್ತಾನ ತಂಡ 44. 3 ಓವರ್ ಗಳಲ್ಲಿ 232 ರನ್ ಗಳಿಗೆ ಸರ್ವಪತನ ಕಂಡಿತು.
ರಹಮತ್ ಶಾ(89 ಎಸೆತದಲ್ಲಿ 79) ಮತ್ತು ಸೆದಿಕುಲ್ಲಾ ಅಟಲ್ (50 ಎಸೆತದಲ್ಲಿ 42) ಹೊರತುಪಡಿಸಿದರೆ ಅಫ್ಘಾನಿಸ್ತಾನದ ಬೇರಾವ ಬ್ಯಾಟರ್ ಕೂಡ ಪ್ರತಿರೋಧ ತೋರದ್ದರಿಂದ ಭಾರತದ ಬೌಲರ್ ಗಳಿಗೆ ಕೆಲಸ ಸುಲಭವಾಯಿತು. ಅರ್ಶದೀಪ್ ಸಿಂದ್ ಮತ್ತು ಗುರ್ನೂರ್ ಬ್ರಾರ್ ತಲಾ 3 ವಿಕೆಟ್ ಉರುಳಿಸಿದರು. ಪ್ರಿನ್ಸ್ ಯಾದವ್ 2 ವಿಕೆಟ್ ಮತ್ತು ವಾಶಿಂಗ್ಟನ್ ಸುಂದರ್ 1 ವಿಕೆಟ್ ಗಳಿಸಿದರು.
ಗಿಲ್- ಇಶಾನ್ ಭರ್ಜರಿ ಶತಕ
ಇದಕ್ಕೂ ಮೊದಲು ಟಾಸ್ ಸೋತು ಬ್ಯಾಟಿಂಗ್ ಗೆ ಇಳಿಸಲ್ಪಟ್ಟ ಭಾರತ ತಂಡಕ್ಕೆ ಮಧ್ಯಮವೇಗಿ ಮೊಹಮ್ಮದ್ ಸಲೀಮ್ ಆಘಾತ ನೀಡಿದರು. 4 ರನ್ ಗಳಿಸಿದ್ದ ಯಶಸ್ವಿ ಜೈಸ್ವಾಲ್ ಅವರ ವಿಕೆಟ್ ಎಗರಿಸಿದರು. ಈ ವೇಳೆ ಮಾಜಿ ನಾಯಕ ರೋಹಿತ್ ಶರ್ಮಾ ಅವರನ್ನು ಸೇರಿಕೊಂಡ ನಾಯಕ ಶುಭಮನ್ ಗಿಲ್ ಅವರು 2ನೇ ವಿಕೆಟ್ ಗೆ 87 ರನ್ ಗಳ ಜೊತೆಯಾಟವಾಡಿದರು. ಈ ವೇಳೆ 48 ರನ್ ಗಳಿಸಿ ಉತ್ತಮವಾಗಿ ಆಡುತ್ತಿದ್ದ ರೋಹಿತ್ ಶರ್ಮಾ ಅವರು ರಶೀದ್ ಖಾನ್ ಬೌಲಿಂಗ್ ನಲ್ಲಿ ಕ್ಲೀನ್ ಬೌಲ್ಡ್ ಆದರು.
ಈ ಬಳಿಕ ಇಶಾನ್ ಕಿಶನ್ ಮತ್ತು ಗಿಲ್ ಅವರು 3ನೇ ವಿಕೆಟ್ ಗೆ 224 ರನ್ ಗಳ ಮಹತ್ವದ ಜೊತೆಯಾಟವಾಡಿದರು. ಈ ವೇಳೆ ಇಶಾನ್ ಕಿಶನ್ ಅವರು 110 ಎಸೆತಗಳಿಂದ 154 ರನ್ ಬಾರಿಸಿದರು. ಇದರಲ್ಲಿ 22 ಬೌಂಡರಿ ಮತ್ತು 2 ಸಿಕ್ಸರ್ ಗಳಿದ್ದವು. ಇನ್ನು ಇಶಾನ್ ಕಿಶನ್ ಅವರು 79 ಎಸೆತಗಳಲ್ಲಿ 14 ಬೌಂಡರಿ ಮತ್ತು 7 ಸಿಕ್ಸರ್ ಗಳಿದ್ದ 125 ರನ್ ಗಳಿಸಿದರು. ಇವರಿಬ್ಬರ ವಿಕೆಟ್ ಪತನದ ಬಳಿಕ ಭಾರತದ ವಿಕೆಟ್ ಗಳು ಒಂದರ ಹಿಂದೊಂದರಂತೆ ಉರುಳಿದವು. ಹೀಗಾಗಿ 450ರ ಮೇಲಿನ ಮೊತ್ತ ಪೇರಿಸುವ ಸೂಚನೆ ನೀಡಿದ್ದ ಭಾರತ 402 ರನ್ ಗಳಿಗೆ ಇನ್ನಿಂಗ್ಸ್ ಮುಕ್ತಾಯಗೊಳಿಸಿತು.
ಅಂತಾರಾಷ್ಟ್ರೀಯ ಏಕದಿನ ಪಂದ್ಯಗಳಲ್ಲಿ ಭಾರತ ತಂಡ 400ರ ಗಡಿ ದಾಟುತ್ತಿರುವುದು 8ನೇ ಬಾರಿಯಾಗಿದೆ. ಅಷ್ಟೇ ಬಾರಿ ಈ ಸಾಧನೆ ಮಾಡಿದ್ದ ದಕ್ಷಿಣ ಆಫ್ರಿಕಾ ಹೆಸರಲ್ಲಿ ಈ ವಿಶ್ವದಾಖಲೆ ಇತ್ತು. ಇದೀಗ ಭಾರತ ತಂಡ ದಕ್ಷಿಣ ಆಫ್ರಿಕಾ ತಂಡದ ಸಾಧನೆಯನ್ನು ಸರಿಗಟ್ಟಿದೆ.