ಬೆಂಗಳೂರು: ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಬೆಂಗಳೂರಿನ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಮ್ಯಾನೇಜ್ಮೆಂಟ್(ಐಐಎಂ-ಬಿ) ಸುವರ್ಣ ಮಹೋತ್ಸವ ಉದ್ಘಾಟಿಸಿದ ಸಂಬಂಧ ರಾಜ್ಯಪಾಲರ ಕಚೇರಿಯಿಂದ ಹೊರಡಿಸಲಾದ ಮಾಧ್ಯಮ ಬಿಡುಗಡೆ ಪತ್ರದಲ್ಲಿ ಬೆಂಗಳೂರಿನ ಹೆಸರನ್ನು ತಪ್ಪಾಗಿ ಉಲ್ಲೇಖಿಸಿದ್ದಕ್ಕೆ ಆಮ್ ಆದ್ಮಿ ಪಕ್ಷ ಆಕ್ಷೇಪ ವ್ಯಕ್ತಪಡಿಸಿದೆ.
ಬೆಂಗಳೂರಿನ ಹೆಸರನ್ನು ಬೆಂಗಳೂರು ಎಂದೇ ಉಲ್ಲೇಖಿಸಬೇಕು. ಬ್ಯಾಂಗಲೋರ್ ಎನ್ನುವುದು ತಪ್ಪು. ಬೆಂಗಳೂರು ಎಂಬುದು ಬೆಂಗಳೂರಿಗರ ಹೆಮ್ಮೆ ಸಂಕೇತವಾಗಿದೆ. ಕನ್ನಡಿಗರ ಪ್ರತಿಷ್ಠೆಯಾಗಿದೆ. ಕರ್ನಾಟಕದ ರಾಜಧಾನಿಯ ಹೆಸರನ್ನು ಅಧಿಕೃತವಾಗಿ ಬೆಂಗಳೂರು ಎಂದು ಘೋಷಿಸಲಾಗಿದೆ. ಹಾಗಾಗಿ ಅಧಿಕೃತ ಹೇಳಿಕೆಗಳಲ್ಲಿ ಬೆಂಗಳೂರು ಎಂದೇ ಬಳಕೆ ಮಾಡಬೇಕು ಎಂದು ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್ ಅವರಿಗೆ ಪಕ್ಷದ ರಾಜ್ಯ ಉಪಾಧ್ಯಕ್ಷ ರಮೇಶ್ ಬೆಲ್ಲಂಕೊಂಡ ಮನವಿ ಮಾಡಿದ್ದಾರೆ.
ಈ ಸಂಬಂಧ ರಾಜ್ಯಪಾಲ ಥಾವರ್ ಚಂದ್ ಗೆಹ್ಲೋಟ್ ಅವರಿಗೆ ರಮೇಶ್ ಬೆಲ್ಲಂಕೊಂಡ ಅವರು ಪತ್ರ ಬರೆದು ಬೆಂಗಳೂರು ಎಂದು ಬಳಸುವಂತೆ ಕೋರಿದ್ದಾರೆ.2005ರ ಡಿಸೆಂಬರ್ 11ರಂದು ಬ್ಯಾಂಗಲೋರ್ ಹೆಸರನ್ನು ಬೆಂಗಳೂರು ಎಂದು ಅಧಿಕೃತವಾಗಿ ದಾಖಲಿಸಬೇಕು ಎಂಬ ಜ್ಞಾನಪೀಠ ಪುರಸ್ಕೃತ ಯು.ಆರ್.ಅನಂತಮೂರ್ತಿ ಅವರ ಮನವಿಯನ್ನು ರಾಜ್ಯಪಾಲರು ಸ್ವೀಕರಿಸಿದ್ದರು.
2006 ಸೆಪ್ಟೆಂಬರ್ 27ರಂದು ‘ಬೆಂಗಳೂರು’ ಎಂಬ ಹೆಸರನ್ನು ಘೋಷಿಸಿ ಬಿಬಿಎಂಪಿ ಅಧಿಕೃತ ನಿರ್ಣಯವನ್ನು ಅನುಮೋದಿಸಿದೆ ಹಾಗೂ ರಾಜ್ಯಪಾಲರ ಭವನದಿಂದ ಪ್ರಕಟಿಸುವ ಯಾವುದೇ ಅಧಿಕೃತ ಪತ್ರಗಳು ಕನ್ನಡದಲ್ಲಿಯೂ ಸಹ ಪ್ರಕಟಿಸಲು ರಮೇಶ್ ಬೆಳ್ಳಂಕೊಂಡ ಮನವಿ ಮಾಡಿಕೊಂಡರು.
