2025ರ ಮೆಗಾ ಹರಾಜು ಸೌದಿ ಅರೇಬಿಯಾದ ಜೆಡ್ಡಾದಲ್ಲಿ ಮುಕ್ತಾಯಗೊಂಡಿದೆ. ಭಾರೀ ಕುತೂಹಲಕ್ಕೆ ಕಾರಣವಾಗಿದ್ದ ಈ ಹರಾಜಿನಲ್ಲಿ ರಿಷಭ್ ಪಂತ್, ಶ್ರೇಯಸ್ ಐಯ್ಯರ್ ಮುಂತಾದ ಆಟಗಾರರು ಭಾರೀ ಮೊತ್ತಕ್ಕೆ ಬಿಡ್ ಆಗಿದ್ದಾರೆ. ಜೊತೆಗೆ, ಹೊಸ ತಂಡದ ಪರವಾಗಿ ಆಡಲಿದ್ದಾರೆ.
ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಮುನ್ನಡೆಸುತ್ತಿದ್ದ ಟೀಮ್ ಇಂಡಿಯಾ ಸ್ಟಾರ್ ಬ್ಯಾಟ್ಸಮ್ಯಾನ್ ಕಮ್ ವಿಕೆಟ್ ಕೀಪರ್, ಐಪಿಎಲ್ ಇತಿಹಾಸದಲ್ಲೇ ಅತಿಹೆಚ್ಚಿನ ಮೊತ್ತಕ್ಕೆ ಹರಾಜಾದ ಆಟಗಾರರಾಗಿದ್ದಾರೆ. ಅವರನ್ನು ಲಕ್ನೋ ತಂಡ 27 ಕೋಟಿ ರೂಪಾಯಿಗೆ ಖರೀದಿಸಿತ್ತು.
ರಿಷಭ್ ಪಂತ್ ಅವರನ್ನು ಉಳಿಸಿಕೊಳ್ಳಲು ಲಕ್ನೋ ತಂಡಕ್ಕೆ ಪೈಪೋಟಿಯನ್ನು ಯಾಕೆ ನೀಡಲಿಲ್ಲ ಎನ್ನುವುದರ ಬಗ್ಗೆ ಡೆಲ್ಲಿ ಕ್ಯಾಪಿಟಲ್ಸ್ ತಂಡದ ಸಹ ಮಾಲೀಕ ಪರ್ತ್ ಜಿಂದಾಲ್ ಸ್ಪಷ್ಟನೆಯನ್ನು ನೀಡಿದ್ದಾರೆ. ನಮ್ಮೆಲ್ಲಾ ಪ್ರಯತ್ನವನ್ನು ನಾವು ಮಾಡಿದ್ದೆವು ಎಂದು ಹೇಳಿದ್ದಾರೆ.
"ರಿಷಭ್ ಪಂತ್ ಅವರನ್ನು ಉಳಿಸಿಕೊಳ್ಳಲು ನಮ್ಮ ಫ್ರಾಂಚೈಸ್ ಸಾಧ್ಯವಾದ ಎಲ್ಲಾ ಪ್ರಯತ್ನವನ್ನು ಕೊನೆಯ ಕ್ಷಣದವರೆಗೂ ಮಾಡಿತ್ತು. ಆದರೆ, ರಿಷಭ್ ಅವರು ತಂಡವನ್ನು ಹೇಗೆ ಮುನ್ನಡೆಸಿಕೊಂಡು ಹೋಗಬೇಕು ಎನ್ನುವುದರ ಬಗ್ಗೆ ಬೇರೆ ನಿಲುವನ್ನು ಹೊಂದಿದ್ದರು " ಎಂದು ಪರ್ತ್ ಜಿಂದಾಲ್ ಹೇಳಿದ್ದಾರೆ.
ರಿಷಭ್ ಅವರನ್ನು ಉಳಿಸಿಕೊಳ್ಳಲು ಒಂದು ಹಂತದವರೆಗೆ ಬಿಡ್ ಮಾಡಿದ್ದ ಡೆಲ್ಲಿ ತಂಡ, ಕೊನೆಗೆ 27 ಕೋಟಿಯ ಭಾರೀ ಮೊತ್ತಕ್ಕೆ ಲಕ್ನೋ ಸೂಪರ್ ಜಯಂಟ್ ತಂಡಕ್ಕೆ ಬಿಟ್ಟು ಕೊಡಬೇಕಾಯಿತು. ಹಾಗಾಗಿ, ಮುಂದಿನ ವರ್ಷದ ಮಾರ್ಚ್ ತಿಂಗಳಿನಿಂದ ಆರಂಭವಾಗುವ ಐಪಿಎಲ್ 2025 ಸೀಸನ್ ನಲ್ಲಿ ಪಂತ್, ಲಕ್ನೋ ತಂಡದ ಪರವಾಗಿ ಆಡಲಿದ್ದಾರೆ.
"ರಿಷಭ್ ಪಂತ್ ಅವರನ್ನು ಜಾಸ್ತಿ ಬಿಡ್ ಎನ್ನುವ ಕಾರಣಕ್ಕಾಗಿ ಕೈಬಿಟ್ಟಿಲ್ಲ. ತಂಡವನ್ನು ಮುನ್ನಡೆಸುವ ವಿಚಾರದಲ್ಲಿ, ಫ್ರಾಂಚೈಸ್ ಗಳು ಹೇಗೆ ಇರಬೇಕು, ತಂಡದ ಮಾಲೀಕರು ಹೇಗೆ ಇರಬೇಕು ಎನ್ನುವ ವಿಚಾರದಲ್ಲಿ ರಿಷಭ್ ತಮ್ಮದೇ ಆದ ಫಿಲಾಸಫಿಯನ್ನು ಹೊಂದಿದ್ದರು. ಹಾಗಾಗಿ, ಲಕ್ನೋ ಜೊತೆ ಪೈಪೋಟಿಗೆ ಹೋಗಿಲ್ಲ "ಎಂದು ಪರ್ತ್ ಜಿಂದಾಲ್ ಸ್ಪಷ್ಟನೆಯನ್ನು ನೀಡಿದ್ದಾರೆ.
