ಹೋಸ್ಟನ್ (ಅಮೆರಿಕ): ಮಿನಿ ವ್ಯಾನ್ ಹಾಗೂ ಟ್ರಕ್ ನಡುವೆ ಸಂಭವಿಸಿದ ಅಪಘಾತದಲ್ಲಿ ಭಾರತೀಯ ಕುಟುಂಬದ ಐವರು ಸೇರಿದಂತೆ ಆರು ಮಂದಿ ಮೃತಪಟ್ಟಿರುವ ಘಟನೆ ಟೆಕ್ಸಾಸ್ ರಾಜ್ಯದಲ್ಲಿ ನಡೆದಿದೆ.ಜಾನ್ಸನ್ ಕೌಂಟಿ ಸಮೀಪ ಮಂಗಳವಾರ ಸಂಜೆ ಅಪಘಾತ ಸಂಭವಿಸಿದೆ ಎಂದು ಟೆಕ್ಸಾಸ್ನ ಸಾರ್ವಜನಿಕ ಸುರಕ್ಷತೆ ಇಲಾಖೆ (ಡಿಪಿಎಸ್) ಅಧಿಕಾರಿಗಳು ತಿಳಿಸಿದ್ದಾರೆ.
ಆಂಧ್ರ ಪ್ರದೇಶದ ಅಮಲಾಪುರಂ ಪಟ್ಟಣದ ಒಂದೇ ಕುಟುಂಬದ ಆರು ಮಂದಿ ವ್ಯಾನ್ನಲ್ಲಿ ಇದ್ದರು. ಈ ಪೈಕಿ 43 ವರ್ಷದ ಲೋಕೇಶ್ ಪೊಟಬತುಲಾ ಮಾತ್ರವೇ ಬದುಕುಳಿದಿದ್ದು, ಅವರೂ ಗಂಭೀರವಾಗಿ ಗಾಯಗೊಂಡಿದ್ದಾರೆ.ಲೋಕೇಶ್ ಅವರ ಪತ್ನಿ ನವೀನಾ ಪೊಟಬತುಲಾ (36), ಅವರ ಮಕ್ಕಳಾದ ನಿಶಿಧಾ (9), ಕಾರ್ತಿಕ್ (10), ನವೀನಾ ಅವರ ತಂದೆ ನಾಗೇಶ್ವರರಾವ್
ಪೊನ್ನಾದ (64), ತಾಯಿ ಸೀತಾಮಹಾಲಕ್ಷ್ಮಿ ಪೊನ್ನಾದ (60) ಹಾಗೂ ಇರ್ವಿಂಗ್ ಪಟ್ಟಣದವರಾದ ವಾಹನ ಚಾಲಕ ರುಷಿಲ್ ಬಾರ್ರಿ (28) ಮೃತಪಟ್ಟವರು ಎಂದು ಇಲಾಖೆ ಅಧಿಕಾರಿಗಳು ಗುರುತಿಸಿದ್ದಾರೆ.
ಪೊಟಬತುಲಾ ದಂಪತಿ ಟಿಸಿಎಸ್ ಕಂಪನಿಯ ನೌಕರರಾಗಿದ್ದರು ಎಂದು ತಿಳಿದುಬಂದಿದೆ.ಟ್ರಕ್ನಲ್ಲಿದ್ದ ಇಬ್ಬರೂ ಗಾಯಗೊಂಡಿದ್ದು, ಟ್ರಕ್ ಚಾಲನೆ ಮಾಡುತ್ತಿದ್ದವರ ಅಚಾತುರ್ಯದಿಂದಲೇ ಅಪಘಾತ ಸಂಭವಿಸಿದೆ ಎಂದು ಅಮೆರಿಕದ ಮಾಧ್ಯಮಗಳು ವರದಿ ಮಾಡಿವೆ.
ಸಂತ್ರಸ್ತರು ಮುಮ್ಮಿದಿವರಂ ಕ್ಷೇತ್ರದ ವೈಎಸ್ಆರ್ಸಿಪಿ ಶಾಸಕ ಪಿ.ವೆಂಕಟ ಸತೀಶ್ ಕುಮಾರ್ ಅವರ ಸಂಬಂಧಿಕರು.
ಮೃತ ದೇಹಗಳನ್ನು ಭಾರತಕ್ಕೆ ತರಲು ಉತ್ತರ ಅಮೆರಿಕದ ತೆಲುಗು ಅಸೋಸಿಯೇಷನ್ (ಟಿಎಎನ್ಎ) ಸಂಘಟನೆ ಸಹಾಯ ಮಾಡುತ್ತಿದೆ ಎಂದು ವೆಂಕಟ ಸತೀಶ್ ಮಾಹಿತಿ ನೀಡಿದ್ದಾರೆ.
