ಅಶ್ವಿನ್ ನಾಯಕನಾಗಿ ನಟಿಸುತ್ತಿರುವ ‘ಸೆಲೆಬ್ರಿಟಿ’ ಸಿನಿಮಾದ ತಾಯಿ-ಮಗನ ಬಾಂಧವ್ಯ ಸಾರುವ ವಿಶೇಷ ಗೀತೆಯೊಂದು ಇತ್ತೀಚೆಗೆ ಬಿಡುಗಡೆಯಾಗಿದೆ. ಕಿರಣ್ ವಿಶ್ವನಾಥ್ ನಿರ್ದೇಶನದ ಈ ಚಿತ್ರದ ಹೊಸ ಹಾಡಿನ ಅನಾವರಣ ಕಾರ್ಯಕ್ರಮದಲ್ಲಿ ನಟ ಅಶ್ವಿನ್ ಮತ್ತು ಹಿರಿಯ ನಟಿ ಸಂಗೀತಾ ಮಾಧವನ್ ಸಿನಿಮಾ ಹಾಗೂ ಹಾಡಿನ ಕುರಿತು ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡಿದ್ದಾರೆ. ಈ ಹಾಡನ್ನು ನಟ, ಜೆಡಿಎಸ್ ನಾಯಕ ನಿಖಿಲ್ ಕುಮಾರಸ್ವಾಮಿ ಅವರು ಬಿಡುಗಡೆ ಮಾಡಿದ್ದಾರೆ.ಪ್ರತಿಯೊಬ್ಬರಿಗೂ ತಾಯಿಯ ನೆನಪು ತರುವ ಹಾಡು ಹಾಡಿನ ಬಗ್ಗೆ ಮಾತನಾಡಿದ ನಟ ಅಶ್ವಿನ್, “ಎಲ್ಲಾ ತಾಯಂದಿರು ತಮ್ಮ ಮಕ್ಕಳ ಭವಿಷ್ಯಕ್ಕಾಗಿ ಪಡುವ ಕಷ್ಟ ಮತ್ತು ಬೆಂಬಲವೇ ಈ ಚಿತ್ರದ ಮುಖ್ಯ ಕಥಾವಸ್ತು. ಈ ಸಾಂಗ್ ಕೇಳಿದಾಗ ಪ್ರತಿಯೊಬ್ಬರಿಗೂ ತಮ್ಮ ತಾಯಿಯ ನೆನಪಾಗುತ್ತದೆ. ಟೀಸರ್ ನೋಡಿ ಮೆಚ್ಚಿಕೊಂಡಿದ್ದ ನಟ, ರಾಜಕಾರಣಿ ನಿಖಿಲ್ ಕುಮಾರಸ್ವಾಮಿ ಅವರು, ನಮಗೆ ಬೆಂಬಲವಾಗಿ ನಿಂತು ಈ ಹಾಡನ್ನು ಬಿಡುಗಡೆ ಮಾಡಿಕೊಟ್ಟಿರುವುದು ತುಂಬಾ ಖುಷಿ ತಂದಿದೆ” ಎಂದರು.ಅಲ್ಲದೆ, ಮೋಹನ್ಲಾಲ್ ಹಾಗೂ ರಜನಿಕಾಂತ್ ಅವರಂತಹ ಹಿರಿಯ ನಟರ ಸಿನಿಮಾಗಳಲ್ಲಿ ನಟಿಸಿರುವ ಸಂಗೀತಾ ಅವರು ಈ ಚಿತ್ರವನ್ನು ಒಪ್ಪಿಕೊಂಡು ಅಭಿನಯಿಸಿರುವುದು ಸಂತಸ ತಂದಿದೆ ಎಂದು ತಿಳಿಸಿದರು. ಚಿತ್ರೀಕರಣದ ಬಗ್ಗೆ ಮಾಹಿತಿ ನೀಡಿದ ಅವರು, “ಡಿಸೆಂಬರ್ನಲ್ಲಿ ಸಿನಿಮಾ ಬಿಡುಗಡೆ ಮಾಡಲು ಯೋಜನೆ ಹಾಕಿಕೊಳ್ಳಲಾಗಿದೆ. ಇನ್ನು ಎರಡು ಫೈಟ್ ಹಾಗೂ ಒಂದು ವಿಶೇಷ ಕ್ಯಾಮಿಯೋ ಹಾಡಿನ ಶೂಟಿಂಗ್ ಬಾಕಿ ಇದೆ. ಈ ಹಾಡಿಗಾಗಿ ದಕ್ಷಿಣ ಭಾರತದ ಖ್ಯಾತ ನಟಿಯೊಬ್ಬರನ್ನು ಕರೆತರುವ ಮಾತುಕತೆ ನಡೆಯುತ್ತಿದ್ದು, ಶೀಘ್ರದಲ್ಲೇ ಫೈನಲ್ ಆಗಲಿದೆ” ಎಂದು ಹೇಳಿದರು.ಈ ಸಿನಿಮಾ ಒಪ್ಪಿಕೊಂಡದ್ದು ಉತ್ತಮ ನಿರ್ಧಾರ: ಚಿತ್ರದಲ್ಲಿ ತಾಯಿಯ ಪಾತ್ರದಲ್ಲಿ ನಟಿಸಿರುವ ಸಂಗೀತಾ ಮಾಧವನ್ ಮಾತನಾಡಿ, “ನಿರ್ದೇಶಕ ಕಿರಣ್ ಮತ್ತು ಕಥೆಗಾರ ಮನೋಜ್ ಕೃಷ್ಣ ಅವರು ಕಥೆ ವಿವರಿಸಿದ ತಕ್ಷಣವೇ ನನಗಿಷ್ಟವಾಯಿತು. ನಂತರ ಈ ತಾಯಿಯ ಹಾಡನ್ನು ಪ್ಲೇ ಮಾಡಿದಾಗ ಅದರ ಮ್ಯಾಜಿಕ್ ಹಾಗೂ ತಾಂತ್ರಿಕ ಗುಣಮಟ್ಟಕ್ಕೆ ನಾನು ಕಂಪ್ಲೀಟ್ ಫ್ಲಾ÷್ಯಟ್ ಆದೆ. ತಾಯಿಯಾಗಿ ನನಗೂ ಈ ಹಾಡು ತುಂಬಾ ಹತ್ತಿರವಾಯಿತು. ಈ ಚಿತ್ರವನ್ನು ಒಪ್ಪಿಕೊಂಡದ್ದು ನನ್ನ ವೃತ್ತಿಜೀವನದ ಅತ್ಯುತ್ತಮ ನಿರ್ಧಾರಗಳಲ್ಲಿ ಒಂದು,” ಎಂದು ಹರ್ಷ ವ್ಯಕ್ತಪಡಿಸಿದರು.
ಉತ್ತಮ ತಾಂತ್ರಿಕ ವರ್ಗ ಹಾಗೂ ಭಾವುಕ ಕಥಾಹಂದರ ಹೊಂದಿರುವ ‘ಸೆಲೆಬ್ರಿಟಿ’ ಚಿತ್ರದ ಈ ಮದರ್ ಸಾಂಗ್ ಸದ್ಯ ಪ್ರೇಕ್ಷಕರ ಗಮನ ಸೆಳೆಯುತ್ತಿದೆ. ಅಶ್ವಿನ್, ಪ್ರಿಯಾಂಕಾ ಆಚಾರ್ ಹಾಗೂ ಸಂಗೀತಾ ಮಾಧವನ್ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿರುವ ಈ ಚಿತ್ರವನ್ನು ಸಾ ರಾ ಮಹೇಶ್ ಮತ್ತು ಸುಷ್ಮಾ ಅಶ್ವಿನ್ ಅವರು ಜಂಟಿಯಾಗಿ ನಿರ್ಮಿಸುತ್ತಿದ್ದು, ಆನಂದ್ ಮೀನಾಕ್ಷಿ ಅವರ ಛಾಯಾಗ್ರಹಣ ಹಾಗೂ ಪ್ರವೀಣ್ ಕೆ ಗೌಡ ಅವರ ಸಂಕಲನ ಕಾರ್ಯವಿದೆ. ಕಲಾ ನಿರ್ದೇಶಕರಾಗಿ ಗುಣ ಹಾಗೂ ಸಹ ನಿರ್ದೇಶಕರಾಗಿ ಮನೋಜ್ ಕೃಷ್ಣ ಕಾರ್ಯನಿರ್ವಹಿಸುತ್ತಿದ್ದಾರೆ.
