ಹಮೀರ್ಪುರ: ಹಿಮಾಚಲ ಪ್ರದೇಶದ ಅಥ್ಲೀಟ್ ಸೌರಭ್ ಶರ್ಮಾ ಅವರು ಸ್ವಿಟ್ಜರ್ಲೆಂಡ್ನ ನಾಟ್ವಿಲ್ ನಗರದಲ್ಲಿ ನಡೆಯುತ್ತಿರುವ ವಿಶ್ವ ಪ್ಯಾರಾ ಅಥ್ಲೀಟ್ ಗ್ರ್ಯಾಂಡ್ ಪ್ರಿಕ್ಸ್ನಲ್ಲಿ ಎರಡು ಚಿನ್ನದ ಪದಕಗಳನ್ನು ಗೆದ್ದರು.
ಹಮೀರ್ಪುರ ಜಿಲ್ಲೆಯ ನಾದೌನ್ ಪ್ರದೇಶದ ಸೌರಭ್, ಟಿ12 ವಿಭಾಗದಲ್ಲಿ ಭಾರತವನ್ನು ಪ್ರತಿನಿಧಿಸುತ್ತಿದ್ದಾರೆ.ಅವರು 155 ಮೀಟರ್ ಮತ್ತು 5000 ಮೀಟರ್ ಓಟದಲ್ಲಿ ಚಾಂಪಿಯನ್ ಆದರು. ಜೂನ್ 6ರಂದು ಆರಂಭವಾದ ಈ ಚಾಂಪಿಯನ್ಷಿಪ್ಗೆ ಭಾನುವಾರ ತೆರೆಬಿತ್ತು.
ಸೌರಭ್ ಅವರು ಈ ಹಿಂದೆ ರಾಷ್ಟ್ರಮಟ್ಟದಲ್ಲಿ ಏಳು ಚಿನ್ನದ ಪದಕ ಗೆದ್ದಿದ್ದರು. ‘ಸೌರಭ್ ಚಿಕ್ಕ ವಯಸ್ಸಿನಿಂದಲೇ ಕ್ರೀಡಾ ಪಯಣ ಆರಂಭಿಸಿದ್ದಾರೆ. ಇಂದು ಭಾರತವನ್ನು ಪ್ರತಿನಿಧಿಸಿ ದೇಶಕ್ಕಾಗಿ ಪದಕ ಗೆಲ್ಲುವ ಕನಸನ್ನೂ ನನಸು ಮಾಡಿಕೊಂಡಿದ್ದಾರೆ’ ಎಂದು ಶರ್ಮಾ ಅವರ ಹಿರಿಯ ಸಹೋದರ ವಿಕಾಸ್ ಹೇಳಿದ್ದಾರೆ.
